बलात्कार गरेको कसुरमा जन्मकैद फैसला

  ०७८ पुस ७ गते

पाँच वर्षीया बालिकालाई बलात्कार गरेको कसुरमा नारायण नगरपालिका–८ सिमाडाका ३६ वर्षीय रामबहादुर विकलाई दैलेख जिल्ला अदालतले जन्मकैदको फैसला गरेको छ ।

जिल्ला न्यायाधीश दण्डपाणी लामिछानेको इजलासबाट पुस १ गते कसुरदार विकलाई २५ वर्ष जन्मकैदसँगै ६ लाख रूपियाँ जरिवाना, १ लाख रूपियाँ पीडितलाई क्षतिपूर्ति र २८ सय रूपियाँ पीडित राहत कोषमा जम्मा गर्नुपर्ने फैसला गरेको जिल्ला अदालतका श्रेस्तेदार इन्द्रबहादुर कार्कीले जानकारी दिनुभयो ।

बालिकालाई ०७७ पुस १७ गते बलात्कार गरेको भन्दै पीडित पक्षले पुस १८ गते जिल्ला प्रहरी कार्यालय दैलेखमा दिएको उजुरीका आधारमा प्रहरीले त्यही दिन गिरफ्तार गरेको थियो ।

पीडित बालिकाको स्वास्थ्य परीक्षण दैलेख अस्पतालमा त्यही दिन भएको थियो ।

जिल्ला सरकारी वकील कार्यालयमार्फत माघ १३ गते दैलेख जिल्ला अदालतमा जबरजस्ती करणी अभियोग पेश गरेकोमा थुनछेक बहसपछि कसुरदारलाई माघ १३ गते पुर्पक्षका लागि दैलेख कारागार थुनामा पठाइएको थियो ।


अमर सुनार