समाचारहरू

१९ वर्षीया युवतीलाई बलात्कार गरेको कसुरमा जिल्ला अदालतले फिदिम नगरपालिका–७ का २३ वर्षीय सन्त भनिने सन्तहाङ लिम्बूलाई आठ वर्ष कैद सजायको फैसला सुनाएको छ ।

न्यायाधीश योगेन्द्रप्रसाद शाहको वैशाख १३ गतेको इजलासले कसुर गरेको ठहर गर्दै कैद सजायको फैसला गरेको अदालतका सूचना अधिकारी चित्रखर अधिकारीले बताउनु भयो ।

अदालको फैसला अनुसार कैद भूक्तानका लागि कसुरदारलाई जिल्ला कारागार हाजिर गराइएको जेलर सुरेन्द्र मुखियाले इन्सेक प्रतिनिधिसँगको फोन सम्पर्कमा बताउनु भयो ।

पीडित युवतीलाई आरोपितले ०७७ वैशाख १ गते बलात्कार गरेको आरोपमा पीडित पक्षले आरोपितविरूद्ध वैशाख १ गते जिल्ला प्रहरी कार्यालयमा उजुरी दिएको थियो ।

आरोपितलाई प्रहरीले कात्तिक १३ गते गिरफ्तार गरी जिल्ला अदालतमा बलात्कार शीर्षकमा मुद्दा दर्ता गरी कारबाही अघि बढाएको थियो ।

जिल्ला अदालतका न्यायाधीश मोहनराज भट्टराईको मङ्सिर १५ गतेको आदेशमा आरोपित पुर्पक्षका लागि थुनामा थिए ।

पीडितको स्वास्थ्य परीक्षण जिल्ला अस्पतालमा कात्तिक १३ गते गरिएको थियो ।

मङ्गल बेघा