बलात्कार गरी हत्या घटनाका आरोपित काका गिरफ्तार

  ०८१ वैशाख ४ गते

१७ वर्षीया भतिजीलाई बलात्कार गरी हत्या गरेको आरोपमा प्रहरीले पुचौँडी नगरपालिकाका ३० वर्षीय काकालाई ०८१ वैशाख ३ गते गिरफ्तार गरेको छ ।

डेढ वर्ष अघि भागेर विवाह गरेकी बालिका ०८० चैत २६ गतेदेखि सम्पर्क विहिन भएकी भन्दै माईती पक्षले प्रहरीमा निवेदन दएपछि घटनाको अनुसन्धान गर्दा बालिकाका काकाले नै बलात्कार गरी हत्या गरेको प्रारम्भिक अनुसन्धानबाट देखिन आएकोले बालिकाका काकालाई गिरफ्तार गरिएको जिल्ला प्रहरी कार्यालय, बैतडीका डिएसपी दिपक गीरीले बताउनु भयो ।

बालिकाका माइती पक्षले बालिका हराएको जाहेरी दिएपछि प्रहरीले घटनाको बारेमा अनुसन्धान सुरु गरेको थियो । बालिकाको शव पुचौँडी नगरपालिका–४ स्थित रानीवन जङ्गलमा ०८० चैत २८ गते फेला परेको थियो । बालिकाको पेटमा १८ हप्ताको गर्भ रहेको पोष्टमार्टमबाट खुलेको र आरोपितले बालिकालाई पटकपटक करणी गर्दा गर्भ रहेपछि बालिकालाई जङ्गलमा बोलाई ढुङ्गा प्रहार गरी हत्या गरेको अनुसन्धानका क्रममा पाइएको डिएसपी गीरीले बताउनु भयो ।

मृतक बालिकाका पति २०८० साउन महिनादेखि रोजगारीको शिलसिलामा भारतमा रहनुभएको बुझिएको र शवको पोष्टमार्टम ०८० चैत ३० गते जिल्ला अस्पताल, बैतडीमा गरेपछि आफन्तहरुले ०८१ वैशाख १ गते दाहासस्कार गरेको जिल्ला प्रहरी कार्यालय, बैतडीका इन्स्पेक्टर खेमविक्रम केसीले बताउनु भयो ।


नरी बडु