समाचारहरू

१३ वर्षीया बालिकालाई बलात्कार गरेको कसुर ठहर गर्दै जिल्ला अदालतले गजुरी गाउँपालिका–४ का ३७ वर्षीय सोमलाल भनिने  शम्भुलाल तामाङलाई  ०८१ जेठ १६ गते १८ वर्ष कैद सजायको फैसला गरेको छ ।

जिल्ला अदालतका न्यायधीश गीता श्रेष्ठको इजलासले कैद सजायसँगै  ५ लाख रूपियाँ जरिबाना र कसुरदारबाट असुल गरिएको रकममध्ये  ३ लाख रूपियाँ पीडितलाई  क्षतिपूर्ति दिने  फैसला गरेको जिल्ला अदालतका स्रेस्तेदार माधव भण्डारीले बताउनु भयो ।

पीडितलाई आरोपितले ०८० असार ३ गते बलात्कार गरेको भन्दै  पीडित पक्षले गजुरी गाउँपालिका–४ का ३७ वर्षीय सोमलाल तामाङविरुद्ध ०८० असार १० गते इलाका प्रहरी कार्यालय गजुरीमा उजुरी दिएका थिए ।

प्रहरीले आरोपितलाई ०८० असार ९ गते गिरफ्तार गरेको थियो । पीडितको स्वास्थ्य परीक्षण असार १० गते धादिङ अस्पतालमा गरिएको थियो ।  जिल्ला अदालतको साउन २ गतेको आदेशले आरोपितलाई पुर्पक्षका लागि थुनामा पठाएको थियो ।

सीताराम अधिकारी