समाचारहरू

१६ वर्षीया बालिकालाई बलात्कार गरेको कसुर ठहर गर्दै जिल्ला अदालतले धुलिखेल नगरपालिका–९ का २० वर्षीय महेश तोलाङ्गेलाई बैशाख २० गते १८ वर्ष कैदको फैसला गरेको छ ।

जिल्ला अदालतका न्यायाधीश राजेन्द्र नेपालको इजलासले कसुर ठहर गर्दै १८ वर्ष कैद, ७ लाख रूपियाँ जरिबाना र ५० हजार रूपियाँ क्षतिपूर्तिको फैसला गरेको अदालतले जनाएको छ ।

पीडितलाई आरोपितले ०८० मङ्सिर १० गते धुलिखेलको एक होटलमा लगेर बलात्कार गरेको भन्दै पीडित पक्षले मङ्सिर १० गते जिल्ला प्रहरी कार्यालय, धुलिखेलमा उजुरी दिएका थिए ।

प्रहरीले आरोपितलाई गिरफ्तार गरी सरकारी वकिल कार्यालयमार्फत् मङ्सिर २५ गते जबरजस्ती करणी अभियोगमा जिल्ला अदालतमा मुद्दा दर्ता गरेको थियो ।

जिल्ला अदालतको ०८० मङ्सिर २७ गतेको आदेश अनुसार आरोपित पुर्पक्षका लागि थुनामा रहेका थिए ।

सुमित्रा आचार्य