बलात्कार कसुर ठहर गर्दै १३ वर्ष कैदको फैसला

१९ वर्षीया युवतीलाई बलात्कार गरेको ठहर गर्दै जिल्ला अदालतले घटनामा सङ्लग्न नौ जनालाई जनही १३ वर्ष कैद र १ लाख रुपियाँ क्षतीपुर्ती भराउने फैसला गरेको छ ।

जिल्ला न्यायधीश अशोककुमार बस्न्यातको इजलाशले समूहिक बलात्कार घटनामा  सङ्लग्न सुस्ता गाउँपालिका– ३, फेनरहवाका २२ वर्षीय सुरेन्द्र यादव, २१ वर्षीय  मनमोहन राजभर, २७ वर्षीय शिवप्रसाद राजभर , ३१ वर्षीय झिमलाल मुसहर , ३५ वर्षीय नेत्रबहादुर चौधरी, २६ वर्षीय सन्दिपप्रसाद यादव, ३३ वर्षीय पिन्टु राजभर र २० वर्षीय अम्मरनाथ भेडियार रहेका छन् ।

आरोपित मध्येका २८ वर्षीय सागर चौधरी भने फरार रहेको जिल्ला अदालतका श्रेस्तेदार प्रेमप्रसाद पौडेलले बताउनु भएको छ ।

पीडितलाई आरोपितहरूले ०७६ भदौ २२ गते बलात्कार गरेको भन्दै पीडित पक्षले भदौ २३ गते इलाका  प्रहरी कार्यालयमा बेलाटारीमा उजुरी दिएका थिए ।

प्रहरीले आरोपितहरूलाई भदौ २४ गते गिरफ्तार गरी मुद्दा चलाएको थियो  ।

पीडितको स्वास्थ्य परीक्षण भदौ २२ गते पृथ्वी चन्द्र अस्पताल गरिएको थियो ।


नारायण पराजुली