बलात्कार कसुर ठहर गर्दै आठ वर्ष कैदको फैसला

  ०८० चैत १६ गते

२६ वर्षीया महिलालाई बलात्कार गरेको कसुर ठहर गर्दै जिल्ला अदालतले  रसुवा जिल्ला गोसाईकुण्ड गाउँपालिका – ५ स्याफ्रबेंसीका २८ वर्षीय ग्यालसाङ तामाङलाई आठ वर्ष कैद सजायको फैसला गरेको छ  ।

जिल्ला अदालतका न्यायाधीश शुभाषबाबु पुरीको इजलासले चैत १५ गते तामाङलाई आठ वर्ष कैद सजाय, तीन लाख रूपियाँ जरिबाना र  ३० हजार रूपियाँ क्षतिपूर्ति भराउने फैसला गरेको अदालतकी स्रेस्तेदार खेमकुमारी बस्नेतले जानकारी दिनुभयो ।

पीडितलाई कसुरदारले विदुर नपा–१ ढुंगेस्थित एक होटेलमा ०७९ चैत ३० गते बलात्कार गरेको भन्दै पीडितले जिल्ला प्रहरी कार्यालयमा ०८० वैशाख २ गते उजुरी दिनु भएको थियो ।

घटनाको सूचनाका आधारमा प्रहरीले तामाङलाई चैत ३० गते विदुर नपा–१० बेत्रावतीबाट गिरफ्तार गरेको थियो । नुवाकोट जिल्ला अदालतको वैशाख २७ गते को आदेश अनुसार तामाङ ४० हजार रूपियाँ धरौटीमा तारेखमा रिहा भएका थिए ।

पीडितको स्वास्थ्य परीक्षण वैशाख २ गते त्रिशूली अस्पतालमा गरिएको थियो ।


नवदीप श्रेष्ठ