समाचारहरू

१७ वर्षीया बालिकालाई बलात्कार गरेको कसुरमा नवलपुर जिल्लाअदालतले नवलपरासी(बर्दघाट सुस्तापश्चिम) रामग्रामनपा– १२ का १९ वर्षीय अजय भरलाई ८ वर्ष कैद सजायको फैसला सुनाएको छ ।

न्यायधीश यज्ञप्रसाद अचार्यको पुस २८ गतेको इजालासले बलात्कार कसुर ठहर गर्दै भरलाई ८ वर्ष कैद सजायको फैसला सुनाएको जिल्ला अदालतका स्रेस्तेदार महेन्द्र प्रसाद पौड्यालले जानकारी दिनुभयो ।

भरले २०७८ साउन २२ गते पीडित बालिकालाई नवलपरासीपूर्व जिल्लाको विनयीत्रिवेणी गाउँपालिका–६ मा बलात्कार पछि हत्या गरेको भन्दै बालिकाका बुबाले २०७८ साउन २४ गते जिल्लाप्रहरी कार्यालय नवलपरासीपूर्वमा उजुरी दिनु भएको थियो ।

भरलाई हत्या कसुरमा भने जिल्लाअदालतले सफाई दिएको छ ।

साउन २२ गते घटना पछि पीडीत बालिकाको स्वास्थ्यमा समस्या देखिएपछि उपचारको लागि पश्चिम नवलपरासी स्थित शहिद स्मृति सामुदायिक अस्पताल चौपत्ता लैजादा अस्पतालले मृत घोषणा गरेको थियो ।

घटनापछि फरार रहेका भरलाई २०७८ कात्तिक २८ गते प्रहरीले घर नजिकैबाट गिरफ्तार गरेकोमा नवलपुर जिल्ला अदालतको कात्तिक २८ गतेको आदेशले आरोपितलाई पुर्पक्षका लागि थुनामा पठाएको थियो ।

मृतकको पोष्टमार्टम लुम्बिनी प्रादेशिक अस्पताल रुपन्देहीमा साउन २४ गते भएको थियो ।

तिर्थराज डुम्रे