समाचारहरू

१० वर्षीया बालिकालाई बलात्कार गरेको कसुर ठहर गर्दै जिल्ला अदालतले वैशाख ६ गते १६ वर्षीय बालकलाई १२ वर्ष ६ महिना कैद सजायको फैसला गरेको छ ।

जिल्ला न्यायाधीश शुभाषबाबु पुरीको इजलासले कसुर ठहर गर्दै १२ वर्ष ६ महिना कैद सजाय र ३ लाख ९६ हजार रूपियाँ जरिबानाको फैसला गरेको स्रेस्तेदार खेमकुमारी बस्नेतले जानकारी दिनुभयो ।

मुलुकी अपराध संहिता २०७४ को दफा २१९ को उपदफा ३ को ‘क’ मा १० वर्षभन्दा कम उमेरको बालिकालाई बलात्कार गरेमा जन्मकैदको सजाय हुने व्यवस्था रहेको छ । नेपालको कानुन अनुसार जन्मकैद भनेको २५ वर्ष कैद सजाय हो । घटना भएको बखत कसुरदारको उमेर १६ वर्षमात्र रहेकोले बालबालिका सम्बन्धी ऐन २०७५ को दफा ३६ को उपदफा ३ मा १४ वर्षभन्दा माथि र १६ वर्षभन्दा मुनीको बालबालिकाले कुनै पनि कसुरजन्य कार्य गरेमा निज बालबालिकालाई उमेर पुगेको व्यक्तिलाई हुने सजायको आधामात्र सजाय हुने व्यवस्था बमोजिम १२ वर्ष ६ महिना कैद सजायको फैसला आएको अधिवक्ता गरिमा पाण्डेले बताउनु भयो ।

बालिकालाई कसुरदारले बालिकालाई ०७९ असार २७ गते बलात्कार गरेको भन्दै पीडित बालिकाकीे आमाले जिल्ला प्रहरी कार्यालयमा असार २९ गते उजुरी दिनु भएको थियो ।  पीडितको स्वास्थ्य परीक्षण असार २९ गते नै त्रिशूली अस्पतालमा गरिएको थियो । नुवाकोट जिल्ला अदालतले आरोपितलाई ०७९ साउन १७ गते पुर्पक्षको लागि बालसुधार गृह, बाँकेमा पठाएको थियो ।

नवदीप श्रेष्ठ