बलात्कार कसुरमा १२ वर्ष कैद फैसला

  ०७८ पुस २८ गते

१५ वर्षीया बालिका बलात्कार गरेको कसुरमा डुङ्गेश्वर गाउँपालिका–१ बेलपाटाका २६ वर्षीय सुरेश विकलाई दैलेख जिल्ला अदालतले पुस २८ गते १२ वर्ष कैद सजायको फैसला गरेको छ ।

जिल्ला न्यायाधीश दण्डपाणी लामिछानेको इजलासबाट उक्त फैसला भएको अदालतका श्रेस्तार इन्द्रबहादुर कार्कीले जानकारी दिनुभयो ।

विकले ०७६ फागुन २५ गते बालिकालाई बलात्कार गरेको भन्दै पीडित पक्षले फागुन २६ गते जिल्ला प्रहरी कार्यालयमा उजुरी दिएको थियो ।

आरोपितलाई त्यही दिन गिरफ्तार गर्नुसँगै बालिकाको स्वास्थ्य परीक्षण फागुन २६ गते नै दैलेख जिल्ला अस्पतालमा भएको थियो ।

उजुरीका सम्बन्धमा प्रहरीले गरेको अनुसन्धानका आधारमा जिल्ला सरकारी वकील कार्यालयले ०७६ चैत २८ गते दैलेख जिल्ला अदालतमा जबरजस्ती करणी सम्वन्धी अभियोग दर्ता गराएको थियो ।

अभियोग सम्बन्धमा चैत २८ गते नै भएको थुनछेक बहसपछि आरोपितलाई पुर्पक्षका लागि दैलेख कारागारमा थुना राखिएको थियो ।

पीडित पक्ष होष्टाइल भएको कारण बलात्कार पुष्टि भए पनि क्षतिपूर्ति तर्फ फैसलामा केही उल्लेख नभएको उहाँले बताउनुभयो ।


अमर सुनार