बलात्कार कसुरमा १२ वर्ष कैदको फैसला

  ०७९ मङ्सिर १२ गते

१७ वर्षीया बालिकालाई बलात्कार गरेको कसुरमा रुकुम पूर्व पुथा उत्तरगङ्गा गाउँपालिका–१ घर भइ घरपझोङ गाउँपालिका–५ बस्ने २२ वर्षीय अमित पुनलाई जिल्ला अदालतले १२ वर्ष कैदको फैसला सुनाएको छ ।

न्यायाधीश ईश्वर पराजुलीको मङ्सिर १२ गतेको इजालसले पुनलाई १२ वर्ष कैद र ४ लाख रुपियाँ जरिबाना तिराउने फैसला सुनाएको हो ।

गत कात्तिक १४ गते कसुर ठहर भई सजाय निर्धारणका लागि पेश भएकोमा न्यायाधीश पराजुलीले उक्त फैसला सुनाउनु भएको जिल्ला अदालत मुस्ताङका श्रेस्तेदार मुकुन्द आचार्यले बताउनु भयो ।

पीडित बालिकालाई आरोपितले ०७८ साउन १४ गते बलात्कार गरेको भन्दै पीडित पक्षले आरोपितविरुद्ध ०७८ साउन १५ गते जिल्ला प्रहरी कार्यालय मुस्ताङमा उजुरी दिएको थियो ।

पीडित पक्षको उजुरीपछि जिल्ला प्रहरी कार्यालय मुस्ताङको प्रहरीले आरोपितलाई सोही दिन थासाङ गाउँपालिका–४ घाँसाबाट गिरफ्तार गरी अनुसन्धान अगाडि बढाएको थियो ।

जिल्ला सरकारी वकिल कार्यालयले ०७८ भदौ ४ गते जिल्ला अदालत मुस्ताङमा अभियोगपत्र दर्ता गराएको थियो ।

पीडित बालिकाको स्वास्थ्य परीक्षण साउन १५ गते जोमसोम अस्पतालमा गरिएको थियो ।


अमृतप्रसाद पौडेल