समाचारहरू

१३ वर्षीया बालिकालाई बलात्कार गरेको कसुरमा तादी गाउँपालिका–३ का १९ वर्षीय नवराज विकलाई जिल्ला अदालत नुवाकोटले दुई वर्ष पाँच महिना कैद सजायको फैसला सुनाएको छ ।

जिल्ला न्यायाधीश मदनबहादुर धामीको इजलासले पुस १३ गते उक्त फैसला सुनाएको हो । फैसलामा रु.२५ हजार जरिवाना र पीडित राहत कोषका रु. १ हजार जम्मा गरिदिने समेत उल्लेख भएको जिल्ला अदालतका सूचना अधिकारी रीता लामिछानेले जानकारी दिनुभयो ।

बलात्कार आरोपमा मुद्दा दर्ता भए पनि अदालतले बालयौन दुर्व्यवहारमा परिणत गराएकोले कम सजायको फैसला भएको सूचना अधिकारी लामिछानेले बताउनुभयो ।

कसुरदार विकले ०७७ जेठ २७ गते बालिकालाई बलात्कार गरेको भन्दै जिल्ला प्रहरी कार्यालयमा ०७७ असार १७ गते उजुरी दर्ता भएको थियो ।

पीडितको असार १७ गते नै त्रिशूली अस्पतालमा स्वास्थ्य परीक्षण भएको थियो । जिल्ला अदालतले कसुरदार विकलाई ०७७ साउन १२ गते पुर्पक्षको लागि थुनामा पठाएको थियो ।

नवदीप श्रेष्ठ