बलात्कारपछि हत्या घटनाका तीन जना आरोपित गिरफ्तार

  ०८० जेठ १८ गते

थुलुङदूधकोशी गाउँपालिका–७ देउसा तेरादुखोरकी ५२ वर्षीया कुमारी राईको बलात्कारपछि हत्या गरेको आरोपमा प्रहरीले तीन जनालाई गिरफ्तार गरेको छ ।

थुलुङदूधकोशी गाउँपालिका–७ लुरूवाका २० वर्षीय युवराज खत्री, ५६ वर्षीय भागिधन राई र ५७ वर्षीय चरण राईलाई अनुसन्धानका लागि गिरफ्तार गरिएको जिल्ला प्रहरी कार्यालयका डिएसपी दीपक श्रेष्ठले बताउनु भयो । पीडित महिलालाई ०८० जेठ ११ गते बलात्कारपछि हत्या गरेको पीडितहरूले बयान दिएको डिएसपी श्रेष्ठले बताउनु भयो ।

आरोपितमध्येका चरण राईलाई जेठ १२ गते, भागिधन राईलाई जेठ १३ गते र युवराज खत्रीलाई जेठ १४ गते घरबाटै गिरफ्तार  गरिएको डिएसपी श्रेष्ठले बताउनु भयो । घटनास्थलमा युवराज राईले चप्पल र कपडा छोडेर भागेपछि सोही आधारमा आरोपितलाई गिरफ्तार गरिएको प्रहरीको भनाइ छ ।

आरोपित तीनै जनाविरूद्ध प्रहरीले जिल्ला अदालतमा जेठ १७ गते बलात्कार र कर्तव्य ज्यान शीर्षकमा मुद्दा दर्ता गरी कारबाही अघि बढाएको छ ।

शवको पोष्टमार्टम जिल्ला अस्पतालमा जेठ १२ गते गरिएको थियो । पीडित पक्षले सोही दिन शव बुझी थुलुङदूधकोशी गाउँपालिका–७ देउसा तेरादुखोरमा सद्गत गरेको छ ।


अञ्जु कार्की