बलात्कारपछि हत्या घटनाका आरोपित गिरफ्तार

  ०७९ असोज १५ गते

मटिहानी नगरपालिका–१ धीरापुर बस्ने ४० वर्षीया आमना खातुनलाई बलात्कार गरी हत्या गरेको आरोपमा प्रहरीले सोही ठाउँ बस्ने २४ वर्षीय मोजाहिर अन्सारीलाई असोज ९ गते गिरफ्तार गरेको छ ।

जिल्ला प्रहरी कार्यालयले जनाए अनुसार खातुनलाई अन्सारीले असोज ७ गते घाँस काट्न गएको बेला चौरमा बलात्कार गरी हत्या गरेर फरार भएको प्रहरीले जनाएको छ ।

आरोपित अन्सारीलाई असोज ९ गते मधेस प्रदेश प्रहरी कार्यालय जनकपुर र जिल्ला प्रहरी कार्यालय महोत्तरीबाट खटिएको संयुक्त प्रहरी टोलीले गिरफ्तार गरेको महोत्तरीका एसपी कृष्णप्रसाद पङ्गेनीले जानकारी दिनु भयो ।

आरोपित अन्सारीले महिलालाई बलात्कारपछि पेचकसले घाँटी, छाती र पेटमा घोचेर हत्या गरेको आरोप छ ।

महिलाको शव बाँसघारीमा असोज ७ गते राती १० बजे फेला पारेको एसपी पङ्गेनीले जानकारी दिनु भयो ।

एसपी पङ्गेनीको अनुसार खातुन असोज ७ गते बिहान ११ बजेको समयमा घाँस काट्न भनि घरबाट हसियाँ र प्लाष्टिकको बोरा लिई गएकोमा साँझसम्म पनि घर फर्की नआएपछि घर छिमेकी तथा आफन्त समेतले खोजतलास गर्दा फेला नपरेपछि प्रहरीलाई खबर गरिएको थियो ।

प्रहरीले खबर पाएपछि खोजतलास गर्ने क्रममा राती १० बजे धिरापुर गाउँदेखि १.५ किमी पूर्व पर्ने बिगही खोलाको किनारमा पर्ने झिँझा बगैँचाको बाँसघारीमा मृत अवस्थामा फेला परेको थियो ।

घटनास्थलमा मृतकको लुगाफाटा च्यातिएको, सुरुवालको डोरी चुँडिएको, पोते चुँडिएको, चुरा फुटेको, कुर्ताका गोजीको टुक्रा फालिएको र आरोपितको गन्जी पनि च्यातिएको अवस्थामा फेला परेको थियो ।

आरोपितले १ सय मिटरसम्म शवलाई घिसारेर बाँसघारी ल्याएर राखेको अर्धनग्न अवस्थामा शव फेला परेको थियो ।

साथै हत्यापश्चात् अभियुक्तले मृतकसँग रहेको पाउजू र नाकको फुली निकालेर जिल्ला सदरमुकाम जलेश्वरस्थित एक सुन पसलमा बेचेको पाइएको छ । प्रहरीले घटना भएको ३६ घण्टापछि आरोपितलाई गिरफ्तार गरेको थियो ।

आरोपितमाथि प्रहरीले कर्तव्य ज्यान मुद्दा चलाएर अनुसन्धान अगाडि बढाएको र घटनाको थप अनुसन्धान प्रक्रिया अगाडि बढाइएको एसपी पङ्गेनीले बताउनु भयो । शवको पोष्टमार्टम जिल्ला अस्पताल जलेश्वरमा असोज ८ गते गरिएको छ ।


अजयकुमार साह