बलात्कारपछि हत्या घटनाका आरोपित गिरफ्तार

  ०७८ भदौ ८ गते

मादी गाउँपालिका–९ सिप्लिवेशीकी १७ वर्षीया कोपिला परियारको बलात्कारपछि हत्या गरेको आरोपमा प्रहरीले स्याङ्जा हरिनास गाउँपालिका–६ चालिसे बस्ने ४५ वर्षीय राम बहादुर थापा (मोटे) भनिने खड्क बहादुर खवासलाई भदौ ६ गते गिरफ्तार गरेको छ ।

मादी गाउँपालिका–९ मकैबारी स्थित मामाघर बस्दै आएकी कोपिला ०७७ असार १५ गतेदेखि हराएकी थिइन ।

उनको शव असार २५ गते मादी गाउँपालिका–११ मुखियाको शेर स्थित पातीघरमा सडेको अवस्थामा फेला परेको थियो ।

प्रहरीले अनुसन्धानको क्रममा आरोपितलाई स्याङजा पुतलीबजार–४ शिवमन्दिर चोकबाट जिल्ला प्रहरी कार्यालय स्याङजाको सहयोगमा गिरफ्तार गरेको जिल्ला प्रहरी कार्यालय कास्कीका डिएसपी सुवास हमालले जानकारी दिनुभयो ।

मृतक र आरोपितबिच प्रेम सम्बन्ध रहेको र मृतकले आरोपितलाई विवाह गर्न दबाब दिन थालेपछि असार १५ गते बलात्कारपछि हत्या गरेको आरोपितको बयानमा खुलेको उहाँले बताउनुभयो ।

प्रहरीले आरोपितविरुद्ध जिल्ला अदालत कास्कीबाट कर्तव्य ज्यानसम्बन्धी मुद्दा अन्तर्गत १० दिनको म्याद थप गरी घटनाको अनुसन्धान गरिरहेको डिएसपी हमालले जानकारी दिनुभयो ।


सुशन घिमिरे