समाचारहरू

१५ वर्षीया एक बालिकालाई बलात्कार गरेको कसुरमा १७ वर्षीय बालकलाई ०८१ भदौ १६ गते जिल्ला अदालत धादिङले १२ वर्ष ८ महिना कैद सजायकाे फैसला सुनाएकाे छ ।

जिल्ला न्यायाधीश गोपालप्रसाद बस्तोलको इजलासले कसुरदार १८ वर्ष मुनिको बालक भएकोले १२ वर्ष ८ महिना कैद साथै ४ लाख ७३ हजार १ रुपियाँ क्षतिपूर्ति तिर्न फैसला सुनाएकाे जिल्ला अदालतका तहसिलदार तथा सूचनाअधिकारी ध्रुब सुवेदीले जानकारी दिनुभयो । कसुरदारले  तिर्ने जरिबानाको रकम पीडितलाई भराउन समेत आदेश दिएको छ ।

जिल्ला अदालतले गरेको फैसलामा कसुरदारले मुद्दा फैसला भएको तीन महिनाभित्र जरिबाना रकम दाखिला गरेमा कसुरदार बालकले पाउने सुबिधा अन्तरगत १० वर्ष ८ महिना कैद छुट भइ २ वर्षमात्र कैद सजाय पाउने फैसलामा उल्लेख छ ।

कसुरदारले आगामी ५ वर्षभित्र कुनैपनि फौजदारी अभियोग प्रमाणित हुने किसिमको कसुर नगर्ने प्रतिवद्धता सहित अदालतमा प्रतिवद्धता जनाएमा कैद छुटको सुविधा लिन पाउने छ । कसुरदारले अदालतमा गरेको लिखित प्रतिवद्धता तोडेमा पूरै समय सजाय हुने छ ।

कसुरदारले बालिकामात्र भएको मौका पारी ०८१ असार २१ गते बालात्कार गरेकोमा पीडित पक्षको सोही दिनको उजुरीकाे आधारमा उसलाई असार २२ गते गिरफ्तार गरिएको थियो । जिल्ला प्रहरी कार्यालयमा असार २१ गते दर्ता भएको मुद्दा जिल्ला अदालतमा साउन ७ गते दर्ता भइ साउन ८ गते कसुरदारलाई पुर्पक्षका लागि बालसुधारगृह भक्तपुरमा राखिएको थियो । पीडितको असार २२ गते धादिङ अस्पतालमा स्वास्थय परीक्षण भएको थियो ।

सीताराम अधिकारी