समाचारहरू

२० वर्षीया महिलालाई बलात्कार गरेको आरोपमा मालिकार्जुन गाउँपालिका-३ का ३७ वर्षीय गम्भीरसिंह धामीविरुद्ध दिइएको उजुरी प्रहरीले दर्ता गर्न नमानेको भन्दै सहयोगका लागि पीडित पक्षले इन्सेकको सहयोग मागेको छ ।

पीडितका आफन्तले वैशाख ७ गते भएको उक्त घटनाको उजुरी अहिलेसम्म पनि दर्ता नगरेको भन्दै वैशाख ११ गते इन्सेक प्रतिनिधिलाई सहयोगको लागि आवश्यक पहल गरिदिन आग्रह गरेका छन् ।

पीडित पक्षले वैशाख ८ गते प्रहरी चौकी मालिकार्जुनमा निवेदन दिएको थियो । तर, जिल्ला प्रहरी कार्यालयमा मुद्दा दर्ता भइसकेको र अदालतबाट म्याद थप गरि थप अनुसन्धानका लागि आरोपितको बयान लिने काम जारी रहेको इन्सपेक्टर लालबहादुर साउदले बताए ।

इन्सेक प्रतिनिधिले बलात्कार जस्तो मुद्दा दर्ता गर्नमा ढिलाइ गर्न नहुने भन्दै मुद्दा चाँडो दर्ता गर्न इन्सपेक्टर साउदलाई आग्रह गरेका छन् ।

सरकारी वकिल जिल्ला बाहिर रहेकोले जिल्ला अदालतमा मुद्दा दर्ता गर्न नसकिएको भए पनि वकिल आउने वित्तिकै जिल्ला अदालतमासमेत मुद्दा दर्ता गरिने इन्सपेक्टर साउदले बताए । पीडित महिलाको स्वास्थ्य परीक्षण वैशाख ८ गते गोकुलेश्वर अस्पताल, गोकुलेश्वरमा गरिएको प्रहरीले जनायो ।

नरेन्द्रसिह कार्की