समाचारहरू

बलात्कारका कारण गर्भवती भएकी १३ वर्षीया बालिका विराटनगरस्थित कोशी अस्पताल भर्ना भएको चार दिनसम्म पनि अस्पतालको सेवा पाउनबाट वञ्चित भएकी छिन् ।

चैत १४ गते कोशी अस्पताल भर्ना भएपनि छोरीको उपचारबारे अस्पताल प्रशासनले कुनै जानकारी नदिएको पीडितकी ४० वर्षीया आमाले इन्सेक प्रतिनिधिलाई टेलिफोनमा जानकारी दिइन् । पीडितकी आमाले भनिन्-'गर्भ छिप्पिएकाले चाँडो उपचार गर्नु भन्ने सल्लाह ताप्लेजुङ जिल्ला अस्पतालबाट पायौँ । तर, अझै उपचार सुरू नहुँदा चिन्ता थपिएको छ ।' बालिकाको स्वास्थ्य अवस्था असहज हुँदै आएको पनि उनले बताइन् ।

पाँचथरको हिलिहाङ गाउँपालिका-७ का ३३ वर्षीय रामकुमार राईले ०७४ मङ्सिर १५ गते बलात्कार गरेपछि गर्भ रहेको पीडित पक्षले आरोप लगाएको छ ।

पीडित बालिकाको शरीरमा अस्वभाविक परिवर्तन देखिएपछि सोधपुछ गर्ने क्रममा राईले बलात्कार गरेको बालिकाले बताएपछि चैत ८ गते जिल्ला प्रहरी कार्यालयमा उजुरी दिएलगत्तै आरोपितलाई चैत ८ गते नै प्रहरीले गिरफ्तार गरेको छ ।

देवराज गुरूङ