समाचारहरू

१५ वर्षीया बालिकासँग बालविवाह गरेको कसुरमा तिलाठी कोइलाडी गाउँपालिका–५ का १८ वर्षीय शिवनारायण मण्डललाई चैत १४ गते २ वर्ष कैद सजाय भएको छ ।

जिल्ला न्यायाधीश हेमन्त रावलको इजलाशले आरोपितलाई २० हजार रुपियाँ जरिवाना तिराउने, ३५ हजार रुपियाँ क्षतिपूर्ति भराउने र ४ सय रुपियाँ फौजदारी कसुर पीडित राहत कोषमा जम्मा गराउने फैसला समेत गरेको छ ।

ललाईफकाई डरधाक देखाई नियन्त्रणमा लिई आरोपितले २०७९ वैशाख २९ गतेदेखि जेठ ३ गतेसम्म घरमा राखेर बलात्कार गरेको भन्दै पीडितका बुबाले जिल्ला प्रहरी कार्यालयमा २०७९ जेठ ६ गते उजुरी दिनुभएको थियो । पीडितको स्वास्थ्य परीक्षण ०७९ जेठ ७ गते गजेन्द्रनारायण सिंह अस्पताल राजविराजमा भएको थियो ।

आरोपितलाई जेठ ६ गते गिरफ्तार गरी जिल्ला प्रहरी कार्यालयले जेठ ७ गते बलात्कारको उजुरी दर्ता गरेको थियो । जिल्ला अदालतमा जेठ २६ गते अभियोग पत्र दायर भएकोमा जिल्ला न्यायाधीश चन्द्रमणि ज्ञवालीको जेठ २७ गतेको आदेश अनुसार आरोपित पुर्पक्षका लागि बालसुधार गृह विरगञ्जमा छन् ।

अदालतका सूचना अधिकारी भरतमणि पोखरेलका अनुसार प्रहरीले बलात्कारको उजुरी दर्ता र अदालतमा बलात्कारकै अभियोगपत्र दायर भएकोमा दावी परिवर्तन भई बालविवाहमा परिणत भएको छ ।

मनोहरकुमार पोखरेल