समाचारहरू

६ वर्षीया बालिकालाई बलत्कार गरेको आरोपमा पुर्पक्षको लागि सुधार गृहमा रहेका १४ वर्षीय बालकले कसुर गरेको ठहर गर्दै जिल्ला अदालतले असोज ९ गते ६ महिना कैदको सजाय सुनाएको छ ।

न्यायाधीश उमेशप्रसाद लुइटेलको इजलासले कसुर ठहर गर्दै ६ महिना कैद सजायको फैसला गरेको हो ।

पीडित बालिकालाई आरोपितले ०७५ साल फागुन २५ गते बलत्कार गरेको भन्दै पीडित पक्षले फागुन २५ गते नै जिल्ला प्रहरी कार्यालयमा उजुरी दिएको थियो ।

प्रहरीले सोही दिन आरोपित बालकलाई गिरफ्तार गरेको थियो । आरोपितलाई जिल्ला अदालतले ०७५ चैत १९ गते पुर्पक्षका लागि बाल सुधार गृहमा राख्न आदेश दिएपछि बालकलाई नेपालगञ्ज बाल सुधार केन्द्रमा पठाइको थियो ।

आरोपित बालकविरूद्ध मुद्दा दर्ता हुँदा उमेर १६ वर्ष उल्लेख भए पनि अदालतको फैसलामा घटना हुँदाका बखत बालकको उमेर १३ वर्ष ३ महिनामात्र रहेको उल्लेख गरिएको छ । पीडित बालिकाको स्वास्थ्य परीक्षण ०७५ साल फागुन २५ गते त्रिशूली जिल्ला अस्पतालमा गरिएको थियो ।

बालकको कैद सजायको अवधि भुक्तान भइसकेकोले जिल्ला अदालतले असोज ९ गते कसुरदार बालकलाई अभिभावकको जिम्मामा छोडिदिनु भन्ने पत्र बालकका अधिवक्तालाई दिएको जिल्ला अदालतका श्रेस्तेदार शिवप्रसाद बञ्जाराले जानकारी दिए ।

नवदीप श्रेष्ठ