समाचारहरू

बर्दगोरिया गाउँपालिका—४ स्थित दानुफाँटा मुक्त कमैया शिविरका  १२ घर परिवारलाई सुरक्षित आवासको लागि मंसिर १६ गते घर हस्तान्तरण गरेको छ ।

बर्दगोरिया गाउँपालिका, सुदूरपश्चिम प्रदेश भूमि व्यवस्था तथा कृर्षी सहकारी मन्त्रालय, हेविट्याट फर ह्युमानिटी नेपाल र राष्ट्रिय दलित  नेटवर्कको संयुक्त पहलमा घर निर्माण गरी १२ घर मुक्त कमैया परिवारलाई हस्तानतरण गरिएको हो ।

०७३ सालमा लालपुर्जा पाएर घर निर्माण गर्न नसकेका १२ मुक्त कमैया घर परिवारलाई सुरक्षित आवासका लागि घर निर्माण सम्पन्न गरी हस्तान्तरण गरिएको राष्ट्रिय दलित नेटवर्कका अध्यक्ष मोहन वर्डले बताउनु भयो ।

सुदूरपश्चिम प्रदेश भूमि व्यवस्था तथा कृर्षी सहकारी मन्त्रालयका मन्त्री बिरबहादुर थापाले यस वर्ष पनि मुक्त कमैया, हलिया र मुक्त कम्लहरीहरुको पुनस्र्थापनका लागि बजेट विनियोजन गरेकोले यसैगरी सबैको हातेमालोमा मुक्त कमैयाहरुको पुनर्स्थापना गर्न सहज हुने बताउनु भयो ।

बर्दगोरिया गाउँपालिकाका अध्यक्ष कर्णबहादुर कुँवरले स्थानीय सरकार मुक्त कमैयाहरुको समस्या समाधानका लागि निरन्तर रुपमा पहल गरिरहेको भए पनि मुक्त कमैया हलिया र मुक्त कम्लहरीहरुको पुनर्स्थापनाका लागि सबैको सहयोगको आवश्यकता रहेको बताउनु भयो ।

०७३ सालमा ३२ मुक्त कमैया परिवारलाई भूमिसुधार कार्यालयले लालपुर्जा दिए पनि घर निर्माण गर्न नसकेर ससाना टहरा बनाएर बस्दै आइरहेको भए पनि १२ घर परिवारलाई सुरक्षित आवास भएको र बाँकी २० परिवारका लागि पनि घर निर्माण गरी दिन दानुफँटाका भलन्सा सुजन डगौरो आग्रह गर्नु भयो ।

 

 

मैनामोती चौधरी