समाचारहरू

पूर्व सूचना तथा सञ्चार प्रविधि मन्त्री गोकुल बाँस्कोटाको घरमा बम विष्फोट गराएको घटनाको आरोपमा प्रहरीले तीन जनालाई गिरफ्तार गरेको छ ।

कैलाली जिल्ला टीकापुर नगरपालिका–२ का ३१ वर्षीय लक्ष्मण सेठ्ठी, कैलाली जिल्ला भजनी नगरपालिका–४ का ३२ वर्षीय अमृतबहादुर कुमाल र कालिकोट सान्नेत्रिवेणी गाउँपालिका–८ का २७ वर्षीय अभिषेक गिरी भन्ने टेकबहादुर बिकलाई गिरफ्तार गरेको महानगरीय अपराध महाशाखाका प्रमुख एसएसपी सहकुल थापाले जानकारी दिनुभयो ।

आरोपितहरूलाई ०७६ चैत ६ गते राजधानीको विभिन्न स्थानबाट गिरफ्तार गरि वीर अस्पतालमा स्वास्थ्य परीक्षण गराई म्याद थपका लागि महानगरीय प्रहरी वृत्त थिमीमा पठाईएको एसएसपी थापाले जानकारी दिनुभयो । आरोपित कुमाल प्रतिबन्धित नेकपाका मध्य कमाण्ड ब्यूरो सदस्य तथा सेठ्ठी र विक पार्टी साधारण कार्यकर्ता रहेको अनुसन्धानबाट खुल्न आएको एसएसपी थापाले जानकारी दिनुभयो ।

घटनामा प्रतिबन्धित नेकपाका उपत्यका इन्चार्ज माइला लामाका अङ्गरक्षक कान्छाराम घिसिङको नाममा रहेको प्रदेश ३–०२–००१ प २८३६ नम्बरको मोटरसाइकल प्रयोग भएको प्रहरीले जनाएको छ । घटनाको मुख्य योजनाकार अमृतबहादुर कुमाल रहेको प्रहरी अनुसन्धानबाट खुलेको एसएसपी थापाले बताउनु भयो ।

भक्तपुरको लोकन्थलीस्थित बास्कोटाको घरमा फागुन २८ गते प्रेसरकुकर बम विस्फोट गराइएको थियो । घटनामा सङ्लग्न रहेको आरोपमा फागनु २८ गते नै प्रहरीले प्रतिबिन्धित नेकपाका भक्तपुर जिल्ला सदस्य देव भन्ने देवीबहादुर गुरुङलाई सुकुम्वासी बस्तीबाट गिरफ्तार गरेको थियो । गिरफ्तार परेका तीनै जनालाई चैत ७ गते जिल्ला अदालत भक्तपुरबाट म्याद थप गरि थप अनुसन्धान सुरु गरेको महानगरीय प्रहरी वृत्त थिमीका इन्स्पेक्टर राजिब गिरीले जानकारी दिनुभयो ।

रमेश गिरी