बम विष्फोटमा परी दुई जना घाइते

  ०७८ चैत १५ गते

इटहरी उपमहानगरपालिका–२ स्थित नवजागृति टोलमा अवस्थित एक घरमा चैत १४ गते राति सुतली बम विष्फोट हुँदा इटहरी उपमहानगरपालिका–२ का २२ वर्षीय रविन थापा र लमजुङ स्थायी घर भई इटहरी उपमहानगरपालिका–२ मा बस्दै आएका २३ वर्षीय शेरजङ्ग गुरुङ घाइते भएको प्रहरीले जनाएको छ ।

जिल्ला प्रहरी कार्यालयका एसपी सञ्जयसिंह थापाले बम विष्फोटमा परी घाइते भएका रविन थापाको विराटनगरस्थित आँखा अस्पतालमा र गुरुङको वीपी कोइराला स्वास्थ्य विज्ञान प्रतिष्ठान धरान घोपामा उपचार भईरहेको इन्सेक प्रतिनिधिसँगको फोन सम्पर्कमा बताउनु भएको छ ।

प्रहरीका अनुसार बम विष्फोटमा परी थापाको आँखामा चोट लागेको छ भने गुरुङको हात र तिघ्रामा चोट लागेको छ ।

इटहरी उपमहानगरपालिका–२ का अमित श्रेष्ठको घरमा सुतली बम विष्फोट भएको र सोही घरमा डेरा गरी बस्ने थापा र गुरुङ घाइते भएको प्रहरीको भनाइ छ ।

बम विष्फोट भएपछि घटनास्थलमा प्रहरीले हिमाल सुरक्षा परिषद्को पर्चा फेला परेको प्रहरीले जनाएको छ ।

हिमाल सुरक्षा परिषद्को पर्चामा सङ्घीयता खारेज, पाँच विकास क्षेत्र कायम गरिनुपर्ने, हिन्दु राष्ट्र कायम गरिनुपर्ने जस्ता माग उल्लिखित भएको प्रहरीले जनाएको छ ।

घटनास्थलमा हिमाल सुरक्षा परिषद्को पर्चा भेटिएपछि सङ्गठित अपराध भएको हुन सक्ने प्रहरीले जनाएको छ ।

Photo 2022330 Sunsari


जयकृष्ण यादव