समाचारहरू

पूर्वसञ्चार तथा सूचना प्रविधि मन्त्री गोकुलप्रसाद बास्कोटाको घरमा बम विष्फोट गराएको घटनाको आरोपमा प्रहरीले एक जनालाई गिरफ्तार गरेको छ ।

घटनामा सङ्लग्न रहेको आरोपमा प्रहरीले लमजुङ्ग मस्र्याङ्दी गाउँपालिका–४ घरभई लोकन्थलीको सुकुम्बासी बस्ती बस्ने ५८ वर्षीय देव भन्ने देवीबहादुर गुरुङ्गलाई गिरफ्तार गरेको महानगरीय प्रहरी परिसर भक्तपुरका एसपी सविन प्रधानले जानकारी दिनुभयो ।

आरोपित प्रतिबन्धित नेकपाको भक्तपुर जिल्ला सदस्य रहेको प्रहरीले जनाएको छ ।

प्रहरीले आरोपितलाई सुकुम्बासी बस्तीबाट गिरफ्तार गरेको र आरोपितको साथबाट प्रेसर कुकर, तार, चन्दा रसिद, पर्चा र पम्प्लेटहरू बरामद गरेको एपसी प्रधानले जानकारी दिनुभयो । आरेपितको स्वास्थ्य परीक्षण फागुन २८ गते भक्तपुर अस्पतालमा गरिएको छ ।

मध्यपुरथिमि नगरपालिका–१ लोकन्थलीस्थित मनोहरा फाँटमा रहेको बास्कोटाको घरमा फागुन २८ गते बिहान बम विष्फोट गराईएको थियो ।

घटनामा बास्कोटा सहित अन्य तीन घरमा क्षति पुगेको छ । बम विष्फोटबाट स्थानीय कपिल घिमिरे, कुबेर केसी र निरसिंह खत्रीको घरमा समेत क्षति पुगेको प्रहरीले जनाएको छ ।

यसैबीच नेपाल कम्युनिस्ट पार्टी (नेकपा) ले नेकपाका केन्द्रीय सदस्य तथा पूर्वमन्त्री बास्कोटको घरमा भएको बम विष्फोटको निन्दा र भर्त्सना गरेको छ ।

घटनापछि नेकपाका अध्यक्ष पुष्पकमल दाहाल ‘प्रचण्ड’ ले विज्ञप्ति जारी गर्दै नेकपाका केन्द्रीय कमिटी सदस्य, प्रतिनिधि सभा सदस्य तथा पूर्वमन्त्री बास्कोटाको निजी निवासमा भएको बम विष्फोट प्रति भर्त्सना गर्नुभएको हो ।

रमेश गिरी