समाचारहरू

कमलामाई नगरपालिका-४, ढकाल गाउँकी ३८ वर्षीया शारदा थापालाई चार दिनसम्म बन्धक बनाई कुटपिट गरेको आरोपमा सोही ठाउँका ६२ वर्षीय एक्कबहादुर खड्का, ३९ वर्षीय मिलन देवकोटा, ३४ वर्षीय निकेश ढकाल, ४२ वर्षीय विष्णु कुमार ढकाल, ३८ वर्षीय इश्वर पोखरेल, ५२ वर्षीय वीर विक्रम ढकाल र पीडितका पति ४२ वर्षीय सन्तोष थापालाई प्रहरीले ०८० पुस ८ गते गिरफ्तार गरेको छ ।

पीडित महिलालाई चार दिनसम्म बन्धक बनाई कुटपिट गरेको थाहा पाएपछि प्रहरीले पुस ८ गते उद्धार गरिएको जिल्ला प्रहरी कार्यालयका एसपी राजकुमार सिलवालले जानकारी दिनुभयो । पीडितको सिन्धुली अस्पतालमा उपचारपछि पुस ९ गते सेफ हाउसमा राखिएको छ ।

पीडित महिलाले भन्नुभयो, 'मलाई पुस ५ गतेदेखि घरको खाँबोमा बाधेर कुट्पिट भयो, मलाई र मेरो पति सन्तोष थापालाई पनि खाँबोमा मैसँग बाँधियो, पछि पतिलाई खोलियो, मलाई पानी पनि खान दिइएन, न शौचालय नै जान पाएँ । प्रहरीलाई जानकारी गराउन खोज्दा मोवाइल नै अफ गरिदिए । मलाई मार्ने र मृत्यु दर्ता गराउँछौ भन्दौ मदिरा र गाँजा खुवाएर कुट्न लगाए ।'

घरको आँगनछेउ बिजुलीको पोलमुनि अचेत भई लडिरहेको अवस्थामा प्रहरीले पुस ८ गते उद्धार गरेको एसपी सिलवालले बताउनु भयो । उद्धारका गर्दा पनि शारदाको शरीरको आधा भाग पोलको डोरीमै बेरिएको उहाँले उल्लेख गर्नुभयो ।

इन्सेक जिल्ला प्रतिनिधिसँग कुरा गर्दै पीडितले भन्नुभयो, 'घरको खाँबोमा बाधेर कुटपिट गरी रहेको अवस्थामा मलाई बिजुलीको पोलमा लगेर बाँधियो र छाती, टाउको, गोडा लगाएत शरीर र सम्वेदनशील अङ्गमा समेत कुटपिट भयो । आरोपितहरूले बाँधेर मुक्का, लात्ती र लौरोले कुटपिट गरे । म बिजुलीको पोलमा बाँधिएको थिएँ । होस आउँदा अस्पतालको वेडमा रहेछु ।'

एसपी सिलवालका अनुसार शारदाका पति सन्तोषले आफूहरूले स्थानीयसँग १ करोड २५ लाख रुपियाँ ऋण लिएको बयान दिएका छन् । बयान अनुसार थापा दम्पतीले काठमाडौँमा जग्गा किन्ने क्रममा उक्त ऋण लिएका थिए । तर, उनीहरूले ऋण तिर्न सकेका थिएनन् । जिल्ला प्रहरी कार्यालयका एसपी सिलवालले भन्नुभयो, 'अचेत अवस्थामा मैले नै शारदाको उद्धार गरेको हुँ, आपराधिक कार्य भएको छ ।'

नबिनबाबु अधिकारी