समाचारहरू

गुल्मीको रिडी क्षेत्रमा रहेको पूर्ववत ५ नम्बर इलाकालाई विभाजन गर्न नहुने र उक्त इलाकालाई एउटै गाउँपालकिा बनाउन तथा त्यसको केन्द्र रिडीमै राख्नु पर्ने माग गर्दै आन्दोलनमा उत्रिएका स्थानीय र प्रहरीबिच कात्तिक २४ गते भएको झडपमा परी एक जना स्थानीय र एक जना प्रहरी इन्स्पेक्टर घाइते भएका छन् ।

झडपमा रिडी इप्रकामा कार्यरत पाल्पा जिल्ला तानसेन नपा-११ का २७ वर्षीय इन्स्पेक्टर केशवराज भट्टराई र रूरू-६ का २५ वर्षीय दिपक कँडेल घाइते भएका हुन् । घाइते दुवै जनाको रूरू प्राथमिक स्वास्थ्य केन्द्रमा उपचार भइरहेको छ । इन्स्पेक्टर भट्टराईको हातमा र स्थानीयबासी कँडेलको टाउको तथा कम्मरमा चोट लागेको प्रहरीले जनाएको छ ।

रिडी नाका खुलाउन माईकिङ् गरेर बल प्रयोग गर्नेक्रममा भएको झडपमा घाइते भएको इन्स्पेक्टर भट्टराईले बताए । 'चारै तिरबाट निस्केका आन्दोलनकारीले अन्धाधुन्दा ढुङ्गा प्रहार गरेपछि झडप भएकाले ६ राउण्ड अश्रृग्याँससमेत प्रहार गर्‍यौँ ।'- भट्टराईले भने ।

विकसित स्थितिलाई ध्यान दिँदै डिएसपी महेन्द्र नेपालको नेतृत्वमा थप सुरक्षाकर्मी रिडी पठाइएको प्रमुख जिल्ला अधिकारी उदयबहादुर रानामगरले बताए । रूरू क्षेत्रको गाउँपालिकाको नाम रूरू नै राखिएपनि केन्द्र भने घिउवेशीमा राखिएको विरोधमा रिडीबासी आन्दोलित भएका हुन् । रिडी क्षेत्रमा रहेको जिल्ला विकास समितिको इलाका नं ५ मा बलेटक्सार, बम्घा, थानपति, ग्वादी, रिमुवा र रूरू गाविस गरी ६ ओटा गाविस रहेका छन् ।

टोपलाल अर्याल