बन्दको अवज्ञा गरेको आरोपमा स्कुटरमा आगजनी

  ०७३ फागुन ३० गते

नेकपा एमालेको मेची महाकाली अभियानलाई लक्षित गरी मधेसी मोर्चाले फागुन २९ गते आह्वान गरेको रुपन्देही बन्दको अवज्ञा गरेको आरोपमा रमवापुर चोकमा लु.१५प.७५५८ नम्बरको स्कुटरमा पेट्रोल छर्केर जलाएको प्रहरीले आरोप लगाएको छ ।

आगजनीपछि स्कुटर पूर्ण रूपमा जलेर नष्ट भएको छ । यसैगरी सोही दिन विवाहका लागि कपिलवस्तुतर्फजन्ती लिएर जाँदै गरेका सवारीधनी सिद्धार्थ नपा-७ का २० वर्षीय सरोज पुनलाई मोर्चाका कार्यकर्ताहरूले कुटपिट गरी घाइते बनाएको पीडितले आरोप लगाएका छन् । कुटपिटबाट घाइते भएका पुनको शरीरभरी निलडाम बसेको जिल्ला प्रहरी कार्यालय रुपन्देहीका डिएसपी बेलबहादुर पाण्डेले जानकारी दिए ।

प्रहरीले स्कुटीमा आगजनी र कुटपिटमा संलग्न रहेको आरोपमा फागुन २९ गते नै चारजनालाई गिरफ्तार गरेको छ । गिरफ्तार हुनेहरूमा गोनाहा गाविस-९ का वसिउद्धिन खान, कम्हरिया गाविस-६ का राजकुमार यादव, करौता गाविस-३ का जमालुद्धिन मुसलमान र कम्हरिया गाविस-६ का नजामुद्धिन मुसलमानलाई कम्हरिया गाविसको रमवापुर चोकबाट फागुन २९ गते दिउँसो गिरफ्तार गरेको प्रहरीले छ । कुटपिट घटनाका पीडितको भिम अस्पताल भैरहवामा उपचार गरिएको डिएसपी पाण्डेले बताए ।


रीमा बि.सी.