समाचारहरू

सङ्घीय गठबन्धन तथा थरुहट /थारुवान सङ्घर्ष समिति कैलालीले सरकारले ल्याएको पश्चिम थरुहट तराईको कैलाली, कञ्चनपुर र पूर्वमा झापा, मोरङ्, सुनसरी बिनाको अपूरो संविधान संशोधनको विरोधमा मङ्सिर १७ गते पत्रकार सम्मेलनमार्फत विभिन्न आन्दोलन खाकाहरू सार्वजनिक गर्दै मङ्सिर २४ गते कैलाली र कञ्चनपुरमा आमहडतालको घोषणा गरेको थियो ।

इन्सेक सुदूर पश्चिमाञ्चल क्षेत्रीय कार्यालय, धनगढीद्वारा मङ्सिर २४ गते धनगढी उमनपामा गरेको अनुगमनका क्रममा धनगढी बजारलगायत आसपासका बाजारहरू पनि बन्द रहेका छन् । यस क्षेत्रमा सञ्चालन हुने उद्योगधन्दा, कलकारखाना, लामो तथा छोटो दुरीमा सञ्चालन हुने यातायातका साधन ठप्प, सम्पूर्ण शैक्षिक संस्थाहरू बन्द रहँदा यस क्षेत्रको जनजीवन प्रभावित भएको छ । हालसम्म कुनै अप्रिय घटनाहरू नभएको पाइएको छ । बन्दका क्रममा रिक्सा र मोटरसाइकल मात्रै सञ्चालनमा रहेका छन् ।

इन्सेक कञ्चनपुर जिल्ला प्रतिनिधि कोमल निरञ्जन भाटका अनुसार थरुहट थारुवान संयुक्त सङ्घर्ष समितिले आह्वान गरेको आमहडतालका कारण मङ्सिर २४ गते कञ्चनपुर जिल्लाको जनजीवन प्रभावित भएको छ ।

बन्दका कारण लामो तथा छोटो दुरीका यातायातका साधन नचलेकाले भारतबाट फर्केने हजारौ यात्रुहरू सिमावर्ती क्षेत्र गड्डाचौकी र महेन्द्रनगर बसपार्कमा अलपत्र परेका छन् । यसैगरी जिल्लाका शैक्षिक संस्थाहरू बन्द भएका कारण विद्यार्थीहरूको पढाइ प्रभावित भएको छ । तर, महेन्द्रनगरका बजारहरू भने खुला नै रहेका र मोटरसाइकल सञ्चालनमा रहेका छन् ।

इन्सेक सुदूर पश्चिमाञ्चल क्षेत्रीय कार्यालय, धनगढी