समाचारहरू

काठमाडौं उपत्यकाको फोहोर विसर्जन गरिदैं आएको बञ्चरेडाँडामा नुवाकोट र धादिङका स्थानीय चैत २४ गते अवरोध गरेको आरोपमा प्रहरीले १३ जनालाई गिरफ्तार गरेको छ ।

विगतमा भएको सहमति कार्यन्वयनमा माग गर्दै स्थानीयले नुवाकोट ककनी गाउँपालिकाको सिसडोलमा भेला भएर बञ्चरेडाँडा ल्याण्डफिल्ड साइट जाने सडक अबरोध गरेको ‘बञ्चरेडाँडा ल्याण्डफिलसाइट प्रभावित क्षेत्र सरोकार समिति’नुवाकोट–धादिङका संयोजक श्रीराम ढुंगानाले बताउनु भयो ।

उक्त समितिको नेतृत्वमा फोहोर विसर्जनमा अवरोध भएपछि प्रहरीले बल प्रयोग गरी संयोजक ढुंगानासहित १३ जनालाई गिरफ्तार गरी बालाजु प्रहरी वृत्त, काठमाण्डौं लगिएको जिल्ला प्रहरी कार्यालय, नुवाकोट डिएसपी तिलक भारतीले बताउनु भयो । संयोजक ढुंगाना बाहेक अरुको नाम खुल्न बाँकी रहेको डिएसपी भारतीले बताउनु भयो ।

यसअघिका सहमति कार्यान्वयन तथा ‘मानवबस्तीरहित ल्याण्डफिलसाइट विकास क्षेत्र’ घोषणाको माग गर्दै फोहर विसर्जनमा अवरोध गरेका थिए ।

गत फागुन २१ गते प्रधानमन्त्रीसमक्ष पेस गरिएका ११ बुँदे मागको सुनुवाइ नभएकाले आन्दोलनमा उत्रिएको स्थानीयले बताएका छन् ।

नवदीप श्रेष्ठ