समाचारहरू

बझाङका सुत्केरी महिलाहरूले ११ महिनादेखि राज्यले उपलब्ध गराउँदै आएको सुत्केरी प्रोत्साहन बापतको भत्ता नपाएको गुनासो गरेका छन् ।

उनीहरूले साउन महिनादेखि सुत्केरीे भत्ता नपाएको गुनासो गरेका छन् । राज्यले अस्पताल र बर्थिङ सेन्टरमा बच्चा जन्माए बापत सुत्केरी महिलालाई हिमाली जिल्लामा प्रति महिना ३ हजार ८ सय रुपियाँ दिँदै आइरहेको भएपनि जिल्ला अस्पताल बझाङले भने साउनदेखि सुत्केरी महिलालाई भत्ता नदिएको पाइएको छ ।

‘अस्पतालमा बच्चा जन्मेपछि राज्यले रकम दिन्छ भन्ने उद्देश्यले केही महिनाअघि सुत्केरी ब्यथा लागेर अस्पताल भर्ना गरेँ । बच्चाको जन्म भयो । डिस्चार्ज भएको पनि धेरै भयो । तर, अस्पतालले सुत्केरी भत्ता अझै पाइएको छैन ।’–तल्कोट गाउँपालिका–९ का सोमबहादुर थापाले भने । थापाकी पत्नी रुपादेवी थापाले पाउनुपर्ने सो रकम अझै नपाएको सोमबहादुरले बताए ।

परिवार स्वास्थ्य महाशाखा काठमाडौँले रकम नपठाइदिँदा सुत्केरीलेलाई सो भत्ता वितरण गर्न नसकेको जिल्ला जनस्वास्थ्य कार्यालय बझाङका प्रमुख डा .सन्दिप ओखेडाले बताए ।

स्थानीय तहमार्फत रकम उपलब्ध हुने भएता पनि अहिलेसम्म अस्पतालमा नपुगेको तर स्वास्थ्यको लागि केही रकम स्थानीय तहको खातामा आइसकेको जिल्ला स्वास्थ्य कार्यालय बझाङका प्रमुख डा .सन्दिप ओखेडाले बताए । ११ महिना यता अस्पतालमा सुत्केरी हुने महिलाको सङ्ख्या ५ सय ३५ जना रहेको जिल्ला जनस्वास्थ्य कार्यालयको तथ्याङ्क रहेको छ ।

रमेश केसी