समाचारहरू

मेलविसौना गाविसमा रहेको खाद्य डिपोमा चामल सकिएको दुई महिना नाघेका कारण यहाँका चार ओटा गाविस रिलु, काँडा, धमेना र मेलविसौनामा भोकमरीको सङ्कट पर्ने भएको छ ।

खाद्य संस्थानले मेलविसौना खाद्य डिपोमा चामल नपठाउँदा चामल किन्न आएका सर्वसाधारणहरू रित्तो हात घर फर्किनु पर्दा भोकमरी हुने भएको हो ।

जिल्ला खाद्य संस्थानको गोदाममा बङ्गलादेशी उसिना मोटो चामल विक्री नभएर थन्किरहेको समाचार सार्वजनिक भएकै बेला विकट गाविस मेलविसौना खाद्य डिपोमा भने चामलको अभाव भएको हो ।

खाद्य संस्थानले विक्री गर्ने अरूवा मोटो चामल सकिएको झण्डै दुई महिना हुँदासमेत चामल ढुवानी गर्न भने सरोकारवालाको ध्यान जान नसकेको स्थानीयको आरोप छ ।

'गाउँमा खानलाई चामल नपाएर भोकमरी फैलिने अवस्था छ ।'-मेलविसौना गाविसकी हरिना विकले भनिन्-'राज्यले तत्काल डिपोमा चामल पठाएर जनतालाई राहात दिनुपर्‍यो ।'

डिपोमा चामल सकिँदा रिलु, काँडा, धमेना र मेलविसौना गाविसका बासिन्दाहरू भोकमरीका चपेटामा परेका छन् ।

खाद्य संस्थानको गोदाममा नै अरूवा मोटो चामल सकिएको भन्दै खाद्य संस्थानका प्रमुख इश्वरीदत्त पाण्डेले भने-'गाउँघरका जनताको माग आएकाले चामल मगाउन पहल भइरहेको छ । चामल आउने बित्तिकै माग भएको डिपोमा चामल पठाउँछौं ।'

प्रकाश विक