समाचारहरू

सिन्धुली अस्पतालमा रहेको एकद्वार संकट व्यवस्थापन केन्द्र (ओसिएमसी) बजेट अभावका कारण व्यवस्थापनमा समस्या भएको छ ।

ओसिएमसीलाई युएनएफपीएले अपनत्व लिन छाडेपछि आर्थिक संकट परेको हो । जसका कारण सेवाग्राहीलाई सेवा प्रदान गर्न समस्या भएको छ ।

ओसिएमसीका घटना व्यवस्थापक सुनिता शर्माले हिंसा पीडितलाई आवश्यक औषधि यातायातको व्यवस्थापन गर्नसमेत समस्या भएको बताउनु भयो । जिल्लाका नौ ओटा स्थानीय तहको साझेदारीमा केन्द्र सञ्चालन गर्ने भने पनि समयमा ओसिएमसीमा स्थानीय तहले बजेट हाल्न नसक्दा समस्या भएको उहाँको भनाइ रहेको छ । ओसिएमसीमा तीनजना कर्मचारी रहेकोमा ०८० फागुनदेखि पारिश्रमिकसमेत पाउन नसकेको उहाँको गुनासो रहेको छ ।

प्रमुख जिल्ला अधिकारी एवम् लैंगिक हिंसा व्यवस्थापन समन्वय समितिका अध्यक्ष भरत खनालले लैंगिक हिंसाका घटना व्यवस्थापनको जिम्मेवारी तीन ओटै तहका सरकारको भएको बताउँदै बजेट अभावले ओसिएमसीको काम रोकिन नहुने बताउनु भयो । उहाँले स्थानीय तहलाई समयमा बजेट निकासा गरिदिन र आगामी दिनका लागि बजेट विनियोजन गर्न आग्रह गर्नुभयो ।

चालु आर्थिक वर्षको ११ महिनामा जिल्लामा ३ सय ५४ लैंगिक हिंसाका घटना एकद्वार संकट व्यवस्थापन केन्द्रमा आएको जनाएको छ । एकद्वार संकट व्यवस्थापन केन्द्रका सदस्य सचिव एवम सिन्धुली अस्पतालका निर्देशक डा. अभिशेक थपलियाले जिल्लामा सवैभन्दा बढी भावनात्मक तथा मानसिक हिंसामा परेकाहरूले सेवा लिएको बताउनु भयो । १ सय १७ जना मानसिक हिंसाबाट प्रभावित भएका छन् । १ सय ६ जना शारीरिक हिंसाबाट प्रभावित भएका छन । जिल्लामा स्रोत र सेवाबाट वञ्चित हुनेको संख्या ७१ रहेको थपलियाले बताउनु भयो । यसैगरी, बलत्कार र यौन दुर्व्यवहारबाट २८ जना पीडित भएका छन् ।

नबिनबाबु अधिकारी