समाचारहरू

बजेट अपुग भएको भन्दै जिल्लाको सर्केगाड गाउँपालिकामा रहेका स्वास्थ्य संस्थाहरूले सुत्केरी उत्प्रेरणा भत्ता वितरण नगर्दा एक वर्षयता स्वास्थ्य संस्थामा सुत्केरी गराउने महिला उत्प्रेणा भत्ताको सुविधाबाट बञ्चित भएका छन् । एक वर्षयता सुत्केरी गराउने १ सय ५० जना महिला प्रसूति भत्ता पाउनबाट बन्चित भएका हुन् ।

सर्केगाड गाउँपालिका–४ मुण्डी गाउँकी सुनिता पालले आपूmले बच्चा जन्माएको एक वर्ष बितिसक्दा पनि भत्ता नपाएको बताइन् ।

नियम अनुसार हामी महिलाहरूले बर्थिङ सेन्टरमा बच्चा जन्माएपछि १ हजार ५ सय रुपियाँ प्रसूति भत्ता बापत पाउने व्यवस्था सरकारले गरेपनि आपूmले भत्ता नपाएको सुनिताको भनाई छ ।

सरकारले भत्ताको व्यवस्था गरेपछि पहाडी जिल्लामा समेत बर्थिङ सेन्टरमा गएर सुत्केरी गराउनेको सङ्ख्या बढेको छ । ‘तर, सरकारले तोके बमोजिम भत्ता नपाउँदा हामी सुत्केरी महिला निरास भएका छौँ ।’–सुनिताले भनिन् ।

बर्थिङ सेन्टरमा बच्चा जन्माएर प्रसूति भत्ता नपाएको गुनासो सोही गाउँपालिका–१ जैरीकी मन्दिरा बुढाको पनि रहेको छ । मन्दिरा भन्छिन्–‘कि भत्ताको व्यवस्था नगर्नु, गरेपछि सबैलाई पुग्ने व्यवस्था गर्नु ।’

बुढाले गत जेठमा बर्थिङ सेन्टरमा बच्चा जन्माएको भए पनि अझै प्रोत्साहन भत्ता नपाएको गुनासो व्यक्त गरिन् ।

आर्थिक वर्ष २०७४/०७५ मा धेरै महिलाहरू प्रसूति भत्ता पाउनबाट बन्चित भएको सर्केगाड गाउँपालिका स्वास्थ्य संयोजक सन्तोष धामी स्वीकार गर्छन् ।

गाउँपालिकाका पाँच ओटै बर्थिङ सेन्टरमा दुई सय जना महिलाहरूले बच्चा जन्माएकोमा ५० जनाले भत्ता पाएको र बाँकी १ सय ५० जना महिलाहरूले सो नपाएको बताए ।

केन्द्रबाट प्रसूति भत्ताका लागि २ लाख ५० हजार मात्र शर्सत बजेट आएको र बर्थिङ सेन्टरमा बच्चा जन्माउने संख्या बढि भएका कारण भत्ता नपुगेको धामीको भनाई छ ।

भत्ता अपुगको समस्याका बारे गाउँपालिकामा कुरा राख्दा समस्या समाधान गरौँला भनेको भए पनि हालसम्म व्यवस्था हुन नसकेको उनले बताए ।

गत बर्ष पनि यही प्रकारको समस्या रहेको तर यस वर्ष समस्या बढेको संयोजक धामीको भनाई छ । यस बर्ष सरकारले हिमाली क्षेत्रमा सुत्केरी प्रोत्साहन भत्ता दोब्बर गरेर तीन हजार पुर्‍याएको भएपनि बजेट भने पुग्दो नभएको धामीले बताए ।

नन्द सिंह