समाचारहरू

अनौपचारिक क्षेत्र सेवा केन्द्र (इन्सेक)का अध्यक्ष सुबोधराज प्याकुरेलले मधेसको विकासको लागि बजेटको कमी नभएर संस्कारको कमी भएको बताएका छन् ।

सिरहाको भलुवाहीमा भदौ ८ गते इन्सेकको साझेदार संस्था नेपाल अपाङ्ग समाजद्वारा आयोजित छलफल कार्यक्रममा अध्यक्ष प्याकुरेलले मधेसको विकासका लागि मात्रै सरकारले ३२ अर्व रुपियाँ विनियोजन गरेको बताए ।

'नागरिकलाई सही सूचना दिनु पर्छ तर सिस्टमको अभावमा जनता समक्ष सही सूचना पुग्दैन ।'-अध्यक्ष प्याकुरेलले भने । जसको लागि काम गर्ने हो उसैलाई सही सूचना नदिने कर्मचारीहरूलाई कारबाही गर्नुपर्नेमा अध्यक्ष प्याकुरेलले जोड दिए ।

उनले भने-'राज्यले बनाएका योजनाहरू लागु गर्न हामी तयार हुनुपर्छ । कुराकानी गर्न जाँगर लगाउनु पर्छ । खराब संस्कारको अन्त्य गरी असल संस्कारको विकास गर्नु पर्छ ।'

अब बन्ने गाउँपालिका पूर्ण अधिकार सम्पन्न स्थानीय संरचना हुने भएता पनि केही राजनीतिक पार्टीले केन्द्र प्रदेशको मातहतमा गाउँ पालिका रहनुपर्छ भनेर जनताको अधिकारलाई कुण्ठित पार्न खोजिएकोमा सजगता अपनाउन उनले आग्रह गरे ।

जागरण नेपालकी अध्यक्ष शर्मिला कार्कीले राज्यले नागरिकलाई मानव अधिकारको प्रत्याभूति दिलाउनुपर्ने बताइन् । राज्यको जिम्मेवारी नागरिकलाई सेवा सुविधा दिनु पर्ने भएकोले नागरिकको घर दैलोमा पुगेर सेवा दिन उनले सरकारसँग आग्रह गरिन् ।

दुर्गा परियार