समाचारहरू

जिल्ला प्रशासन कार्यालय तेह्रथुमले जिल्लाका सदरमुकामसहित जिरिखिम्ती र बसन्तपुर पसलबाट जफत गरेको अखाद्य पदार्थ असोज १० गते जलाएर नष्ट गरेको छ ।

असोज ९ र १० गते बजार अनुगमनको क्रममा पसलेहरूले ग्राहकलाई बेच्न राखेका मध्ये म्याद गुज्रेका, कुहिएका, सडेगलेका खाद्य पदार्थ बजार अनुगमन टोलीले जफत गरेपछि नष्ट गरेको हो ।

सहायक प्रमुख जिल्ला अधिकारी जयप्रकाश बस्नेत, राष्ट्रिय अनुसन्धान, उद्योग बाणिज्य सङ्घ र पत्रकारहरूको रोहवरमा ती अखाद्य वस्तु जलाइएको जिल्ला प्रशासन कार्यालयले जनाएको छ ।

बजार अनुगमनको क्रममा बिष्कुट, चाउचाउ, तेल, मसला र पेय प्रदार्थलगायतका सामग्री जफत गरिएको थियो । सहायक प्रमुख जिल्ला अधिकारी न्यौपानेले बजारमा व्यापारीले मूल्य सूचीसमेत टाँस नगरेको पाइएकोले पहिलो पटक अखाद्य वस्तु विक्री नगर्न र मुल्य सूची टाँस गर्न निर्देशन गरेको बताएका छन् ।

भगिश्वर लिम्बु