बगानका मजदुरद्वारा राजपत्रमा उल्लेख गरिएको ज्याला नपाएको गुनासो 

 

सरकारले नीजिकरण गरेका इलामका चार ओटा चिया बगानमा कार्यरत मजदुरहरूले राजपत्रमा प्रकाशित गरिएको दैनिक ज्याला पाउन नसकेका गुनासो गरेका छन् । चिया विकास निगम अन्तर्गतका कन्याम, इलाम, सोक्तिम र चिलिमकोट चिया बगानमा कार्यरत मजदुरहरूले राजपत्रमा प्रकाशित दैनिक ज्याला नपाएको गुनासो गरेका हुन् ।

बगान व्यवस्थापन पक्षले बगानमा कार्यरत मजदुरहरूलाई दैनिक २ सय १६ रुपियाँ दिँदै आएको छ । यस्तै कारखानाभित्र कार्यरत मजदुरहरूलाई २ सय २७ रुपैयाँ ज्याला दिने गरेको मजदुरहरू बताउँछन् ।

राजपत्रमा चिया बगानका मजदुरको दैनिक ज्याला २ सय २८ रुपियाँ तोकिएको छ भने कारखाना भित्र काम गर्ने मजदुरलाई दैनिक भत्ता ३० रुपियाँ थपेर २ सय ५८ रुपियाँ पुर्‍याइएको छ ।

मजदुरको मासिक ज्याला हाल ६ हजार ३ सय ७५ रुपियाँ छ । गत साउनदेखि ७ हजार ७५ रुपियाँ र दैनिक भत्ता २५ रुपियाँ वृद्धि भएको छ । तर, ०७३ साउनदेखि निगम अन्तर्गतका बगानमा कार्यरत मजदुरले दैनिक २ सय ६ रुपियाँमा बगान व्यवस्थापनले १० रुपियाँ मात्र थपेर दिएको २ सय १६ रुपियाँ ज्याला पाउँदै आएका छन् ।

व्यवस्थापन पक्षले बगान घाटामा रहेकाले तोकिएको ज्याला दिन नसक्ने बरु अवस्था हेरेर बढाउने बताउने गरेको मजदुर विमला मगरले बताइन् । 'झापाको वर्ने र टोकला कमानमा काम गर्नेहरूलाई त पुरै ज्याला दिन्छ अरे । कन्याम, इलाम, सोक्तिम र चिलिमकोटमा कार्यरत मजदुरलाई सरकारले तोकेकै ज्याला दिएको छैन ।'-उनले भनिन्-'दसैँ विदा, बिरामी विदा दिएपनि थप भत्ता दिँदैन । छोराछोरी, पढाउन, घर खर्च चलाउन धेरै मुस्किल छ ।'

दैनिक ज्यालामा 'ठग्दै' आएको व्यवस्थापनले उमेर हदका कारण अवकास पाएका र सट्टामा काम गर्ने छोराछोरी नभएका केही मजदुरहरुलाई उपदान र सञ्चय कोषको रकम नदिएको पनि मजदुरहरू बताउँछन् । बगानभित्रै धुरामा बसेका ती मजदुरहरूलाई व्यवस्थापन पक्षले धुरा बुझाउने सर्त राख्दै धुरा नबुझाएका मजदुरको उपदान र सञ्चयकोषको रकम रोक्का गरिदिएको मजदुरको भनाइ छ ।

कन्याम, चिलिमकोट, सोक्तिम र इलामसमेतमा गरी करिव १ हजार चिया मजदुरहरू कार्यरत रहेको अखिल नेपाल चिया मजदुर सङ्घले जनाएको छ ।

इलामका नीजि कारखानाहरूले भने तोकिए अनुसारको पुरा ज्याला दिने गरेको अखिल नेपाल चिया मजदुर सङ्घका अध्यक्ष उमेश रेग्मीले जानकारी दिए । नीजि कारखानाहरूले बगानमा दैनिक २ सय ५७ र कारखानामा काम गर्ने मजदुरलाई २ सय ५७ मा ३० रुपियाँ भत्ता थप गरि २ सय ८७ रुपियाँ दिने गरेको यहाँ कार्यरत मजदुरहरू बताउँछन् ।


कोकिला ढकाल