समाचारहरू

द्वन्द्वकालमा मारिएका आफ्ना छोराका हत्यारालाई सजायको मागसहित वीर अस्पतालको शैयामै आमरण अनसन बसेकी गोरखा फुजेलकी गङ्गामाया अधिकारीले अनसन तोडेकी छन् ।

मृतक छोरा कृष्णप्रसादको हत्याका विषयमा चितवन जिल्ला अदालतले गङ्गामायाको साक्षी बकपत्र गराउने आदेश दिएपछि कानुनव्यवसायी र मानव अधिकारकर्मीको राय सल्लाहामा भदौ २७ गते साँझ उनले अनसन तोडेकी हुन् ।

‘हत्याका अभियुक्तविरुद्ध चलेको कर्तव्य ज्यान मुद्दामा चितवन जिल्ला अदालतले गम्भीरता देखाएर गङ्गामायाको बकपत्र गराउने आदेश दिएपछि आमरण अनसन तोड्नुभयो । उहाँले झोलिलो सुप पिएर अनसन तोड्नुभएको थियो ।’–अधिवक्ता ओमप्रकाश अर्यालले भने ।

न्यायाधीश टेकनारायण कुँवरको इजलासले अधिकारीलाई भेटेर बकपत्र गराउन भदौ २६ गते चितवन जिल्ला अदालतले आदेश दिएपछि उनले अनसन तोडेको अधिवक्ता अर्यालले इन्सेक अनलाइनलाई बताए ।

गोरखा जिल्ला फुजेल गाविस–७ घर भई चितवनको रत्ननगर नपा–१३ मा आफ्नो हजुर बुबालाई भेट गर्न आएका १७ वर्षीय कृष्णप्रसाद अधिकारीलाई तत्कालीन नेकपा माओवादीका कार्यकर्ताले ०६१ जेठ २४ गते निर्ममतापूर्वक हत्या गरेको आरोप छ ।

छोराको हत्यारालाई कारबाही गरी न्याय दिलाउन भन्दै गङ्गामाया र उनका पति नन्दप्रसाद अधिकारी अनसनमा थिए । अनसनमै रहँदा नन्दप्रसादको ०७१ असोज ६ गते वीर अस्पतालमा मृत्यु भएको थियो । अहिलेसम्म पनि उनको दाहसंस्कार गरिएको छैन । न्याय नपाएसम्म पतिको दाहसंस्कार नगर्ने गङ्गामायाको अडान छ ।

विवेक ढुङ्गाना