समाचारहरू

स्थानीय तहको न्यायिक समितिले स्थानीय रूपमा हुने गरेको फौजदारी प्रकृतिको बाहेक अन्य झैझगडा, मुद्दा मामला मिलाउने अधिकार दिए पनि  सूर्यगढी गाउँपालिकामा फौजदारी प्रकृतिको मुद्दा पनि मिलाएको पाइएको छ ।

सूर्यगढी गाउँपालिकाकी उपाध्यक्ष तथा न्यायिक समिति संयोजक मन्जु बुढाथोकीले एक जनाले बलात्कार गरी महिलालाई गर्भवती बनाएको घटना मिलाएकोमा गल्ती भएको घुमाउरो रूपमा बताइन् ।

घटना कहाँको कहिले भएको तथा पीडक र पीडित बारे सार्वजनिक गरिएको छैन । फागुन १४ गते गाउँपालिकामा आयोजित न्यायिक समिति र मेलमिलापकर्ताको अनुभव आदानप्रदान कार्यक्रममा संयोजक बुढाथोकीले आफूबाट एकपटक गल्ती भएको र बितिसकेको विषयलाई पत्रकारले बाहिर ल्याएको आरोप लगाइन् ।

‘भर्खरभर्खर आएका थियौँ । यो घटनालाई प्रहरीकोमा जाँदा लाज हुन्छ भन्न थाले । मिलाइदिनु भने । मैले मिलाइदिएँ ।’-उनले भनिन्-‘थाहा नभएर यस्तो भएको हो । अब त्यस्तो हुँदैन । हामी राजनीतिक पृष्ठभूमिबाट आएका हौँ । कानुन पढेर आएका होइनौँ । यस्तै कार्यक्रममा बोलेकी थिए । राष्ट्रियस्तरको रेडियोबाट बजाइदिएछन् ।’

उनले आफूले बोलेको कुरा प्रसारण गर्ने कि नगर्ने भनि नसोधी प्रसारण गरेको भन्दै सञ्चारकर्मीप्रति आक्रोश समेत पोखिन् । उनले आगामी दिनमा यस्ता गल्ती नदोहोर्‍याउने र फौजदारी प्रकृतिका उजुरी र झैझगडालाई कानुनी कारबाहीको लागि प्रहरी-अदालतमा पठाउने प्रतिबद्धता समेत जनाइन् ।

उनले न्यायिक समितिका संयोजकका जिम्मेवारी उपाध्यक्षहरूलाई दिइएकोमा न्याय सम्पादनको लागि पर्याप्त तालिमको आवश्यकता रहेको बताइन् ।

कानुनको जानकारीको अभावमा यस्ता भूलहरू अन्यत्र पनि भएका हुनसक्छन् । यस्तो हुन नदिन कानुनी विषयको तालिममा र कानुन जान्ने कर्मचारीको व्यवस्था गर्नु पर्ने समेत सहभागीहरूले बताएका थिए ।

नवदीप श्रेष्ठ