समाचारहरू

निर्वाचन आयोगले दलका शीर्ष नेताहरुमाथि लाञ्छनायुक्त अभिव्यक्ति राखिएको फेसबुक पेज र ग्रुप तत्काल बन्द गर्न निर्देशन दिएको छ ।

‘नो नट अगेन’ लगायतका नाममा बनेका फेसबुक ग्रुपमा शीर्ष नेतामाथि लाञ्छना लगाइएको भन्दै आयोगले यस्ता पेज र ग्रुप तत्काल हटाउन निर्देशन दिएको हो ।

आगामी मङ्सिर ४ गते हुने निर्वाचनका लागि उम्मेदवारी दर्ता भइसकेको सन्दर्भमा यस्ता ग्रुपमार्फत गरिएको लाञ्छनायुक्त अभिव्यक्ति, भ्रामक र द्वेषपूर्ण श्रव्यदृश्य सामग्री विद्युतीय कारोबार ऐनको दफा ४७, निर्वाचन कसूर तथा सजाय ऐन २०७३ को दफा २३ अनुसार कसूर मानिने आयोगले सम्झाएको छ ।

यस्ता गतिविधि निर्वाचन आचारसंहिता विपरीत हुने पनि आयोगले कात्तिक ८ गते जारी गरेको विज्ञप्तिमा उल्लेख छ ।

आयोगका प्रवक्ता शालिग्राम शर्मा पौडेलद्वारा जारी विज्ञप्तिमा यस्तो कसूर गर्नेलाई १ लाख रुपियाँसम्म जरिबाना वा पाँच वर्षसम्म कैद वा दुवै सजाय हुने पनि विज्ञप्तिमा उल्लेख छ ।

 

अनलाइन डेस्क