समाचारहरू

असार २८ गते बुधबारका लागि पेसी तोकिएको गोरखा फुजेलका कृष्णप्रसाद अधिकारीको हत्यासम्बन्धी मुद्दामा १५ औँ पटक पुनः अर्को पेसी मिति तोकिएको छ ।

जिल्ला अदालत चितवनका सूचना अधिकारी केशव पौडेलका अनुसार ०७४ साउन ३१ गते मङ्गलबारका लागि पेसी चढेको छ ।

बिसं २०६१ जेठ २४ गते कृष्णप्रसादका बुबा नन्दप्रसाद अधिकारीले आफ्नो छोराको हत्या भएको भन्दै जिल्ला प्रहरी कार्यालय, चितवनमा उजुरी दिएका थिए ।

त्यसको १ वर्ष ६ महिनापछि कृष्णप्रसादका दाजु नुरप्रसादले १३ जनाविरुद्ध किटानी उजुरी दिएका थिए । अधिकारीलाई माओवादी कार्यकर्ताले ०६१ जेठ २४ गते अपहरण पछि हत्या गरिएको थियो ।

छोरा कृष्णप्रसादको हत्यारालाई कारबाही माग गर्दै अनसनरत आमा गङ्गामायाले गत भदौ २७ गते मात्र अनसन तोडेकी थिइन् । चितवन अदालतका श्रेष्तेदार सहितको टोलीले गत असोज २ गते वीर अस्पतालमै पुगेर गङ्गामायासँग बकपत्र गरेका थिए ।

दिपेन्द्र अधिकारी