समाचारहरू

०८० वैशाख १० गते हुन गइरहेको उपनिर्वाचनमा मिडिया आचारसंहिताको उल्लङ्घन गरेको आरोपमा प्रेस काउन्सिल नेपालले सेतोपाटी अनलाइनलाई २४ घन्टे स्पष्टीकरण सोधेको छ ।

सेतोपाटीले अनलाइनले स्थलगत अध्ययनको दाबी सहित वैशाख ४ र ६ गते प्रतिनिधिसभा बारा निर्वाचन क्षेत्र नं. २ मा ‘जनता समाजवादी पार्टीका उम्मेदवार उपेन्द्र यादव माथि जनमत पार्टीका उम्मेदवार शिवचन्द्र कुशवाहाको अग्रता’ र तनहुँ निर्वाचन क्षेत्र नं. १ मा राष्ट्रिय स्वतन्त्र पार्टीका उम्मेदवार स्वर्णिम वाग्लेले ‘राम्रो मतान्तरसहित जित्ने सम्भावना’ भन्दै समाचार प्रकाशन गरेको थियो ।

प्रेस काउन्सिलको स्पष्टीकरणमा भनिएको छ वैशाख ४ गते ‘यादवलाई बारामा पनि आच्छु आच्छु, कुशवाहको अग्रता’ शीर्षक र ‘तेस्रो स्थानको प्रतिस्पर्धामा रमेश खरेल’ उपशीर्षक तथा वैशाख ६ गते तनहुँ निर्वाचन क्षेत्र नं. १ मा 'राम्रो मतान्तरसहित स्वर्णिम वाग्लेले जित्ने सम्भावना' शीर्षक र ‘पहिले एमालेलाई मत दिएका आधा र कांग्रेसलाई मत दिएका ४० प्रतिशत मतदाता यसपाली स्वर्णिमतिर’ उपशीर्षकमा सेतोपाटी निर्वाचन विश्लेषण भनी सम्प्रेषण भएको सामग्रीप्रति प्रेस काउन्सिलको ध्यानाकर्षण भएको छ ।

चुनावी विश्लेषणका नाममा उपनिर्वाचनका सन्दर्भमा कुनै राजनीतिक दलका उम्मेदवारको पक्ष र कुनै राजनीतिक दलका उम्मेदवारको विपक्षमा आचारसंहिता प्रतिकुल सामग्री के कसरी सम्प्रेषण हुन गएको हो भन्ने कुरा स्पष्टीकरणमा उल्लेख छ ।

पत्रकार आचारसंहिता २०७३, (पहिलो संसोधन, २०७६) को दफा ४ (६) मा पत्रकार तथा सञ्चार माध्यमले सत्य तथा सन्तुलित समाचार प्रकाशन गर्नुपर्ने स्पष्टीकरणमा उल्लेख छ ।

त्यस्तै निर्वाचन आचारसंहिता २०७९, को दफा २५ (ख) मा कसैको पक्ष वा विपक्षमा समाचार प्रकाशन र प्रशारण गर्न नहुने र दफा ४ को (त ) मा उम्मेदवारको मनोनयन दर्ता भएको मितिदेखि मतपरिणामको घोषणा नभएसम्म परिणाम उम्मेदवार वा राजनीतिक दलको मत परिणामका सन्दर्भमा मत सर्वेक्षण गर्न वा त्यस्तो सर्वेक्षणको परिणाम घोषणा गर्न नहुने वा प्रकाशन गर्न नहुने उल्लेख छ ।

विमल पौडेल