समाचारहरू

ढोरपाटन नगरपालिका–१ बुर्तिवाङको न्यू मोर्डन एकेडेमीमा अध्ययनरत तमानखोला गाउँपालिका–२ भयरबोङ्गाका १५ वर्षीय हिक्मत बिकलाई कुटपिट गरेको आरोपमा प्रहरीले सोही विद्यालयका प्रिन्सिपल दीपक कुँवरलाई असार २४ गते गिरफ्तार गरेको छ ।

पीडित विद्यार्थीलाई आरोपितले असार २२ गते कुटपिट गरी घाइते बनाएको आरोपमा इलाका प्रहरी कार्यालय बुर्तिवाङले कुँवरलाई २४ गते गिरफ्तार गरेको जनाएको छ ।

आरोपितलाई गिरफ्तार गरी अनुसन्धान सुरू गरिएको जिल्ला प्रहरी कार्यालय बागलुङका डिएसपी इन्द्रबहादुर रानाले बताउनु भयो ।

घाइते बिकको टाउको र शरीरका विभिन्न अङ्गमा चोट लागेको छ । प्रिन्सिपल कुँवरले बिकको टाउको र शरीरका विभन्न अङ्गमा रबरको पाइपले कुटपिट गरेपछि बालक विद्यालयमै बेहोस भएको पीडित पक्षको आरोप छ ।

घाइते बालकलाई बुर्तिवाङ प्राथमिक स्वास्थ्य केन्द्रमा सामान्य उपचार पश्चात थप उपचारको लागि पोखरा लगिएको आमा मन्सरा बिकले बताउनु भयो ।

पीडित बालककी आमाले इलाका प्रहरी कार्यालय बुर्तिवाङमा असार २३ गते उजुरी दिनुभएको थियो ।

सिर्जना पन्त