समाचारहरू

त्रिविवि चिकित्सा शास्त्र अध्ययन संस्थानका प्रा. डा. गोविन्द केसीले असोज ९ गतेदेखि १२ औँ पटक अनसन सुरू गरेका छन् । विभिन्न पाँच सूत्रीय माग राखी डा. केसी अनसन बसेका हुन् ।

काठमाडौंको महाराजगञ्जस्थित त्रिविवि चिकित्सा शास्त्र अध्ययन संस्थानको हाताभित्र पत्रकार सम्मेलन गरी डा. केसीले अनसन सुरू गरेको जानकारी दिए । सरकारले असोज ९ गते नै व्यवस्थापिका-संसद्बाट बहुचर्चित एवम् बहुप्रतिक्षित राष्ट्रिय चिकित्सा शिक्षा विधेयक, २०७४ लाई संशोधन नगरी पारित गर्न लागेको भन्दै उनले अनसन सुरू गरेको बताएका छन् ।

डा. केसीले माथेमा प्रतिवेदन र आफ्ना सुझावलाई समेत समावेश गरी चिकित्सा शिक्षा ऐन पारित गर्नुपर्ने, सरकारले निर्धारण गरेअनुसार नै काठमाडौँ विश्वविद्यालयले एमबिबिएसको शुल्क लिनुपर्ने, त्रिविवि पदाधिकारीलाई पदबाट बर्खास्त गर्नुपर्ने माग पूरा गर्नुपर्ने भन्दै १२ औँ पटक अनसन शुरू गरेका हुन् ।

हालै बर्खास्त गरिएका नेपाल आयल निगमका कार्यकारी प्रमुखमाथि छानबिन गरी हिनामिना गरिएको भए सो रकम उसुलउपर गर्नुपर्ने, कर्णाली स्वास्थ्य विज्ञान प्रतिष्ठानको पठनपाठन तत्काल सुरू हुनुपर्ने, देशका विभिन्न भागमा मेडिकल कलेज स्थापना गर्ने कार्य अगाडि बढाउनुपर्ने र नेपाल चिकित्सक सङ्घले उठान गरेका माग पूरा गर्नुपर्ने लगायतका माग उनले अघि सारेका छन् ।

सुभाष साह