समाचारहरू

प्राविधिकको अभावका कारणले भुकम्प गएको तीन वर्षबितिसक्दा पनि गोरखा जिल्लामा पुनःनिर्माणको काममा ढिलाइ भएको छ । ०७२ साल वैशाख १२ गते गएको विनाशकारी भूकम्पको कारण जिल्लाका १३ हजार २ सय ७२ घरधुरी पुर्ण क्षति भएका थिए ।

जिल्लामा ४० जना बढी प्राविधिकको आवश्यकता रहेकामा २५ जनामात्रै कार्यरत छन् । ०७५ सालको असार अन्तिमसम्म आइपुग्दा ३ हजार ३ सय ५० घरधुरीले मात्र दोस्रो किस्ता लिएको भूकम्प पुनःनिर्माणका जिल्ला फोकल पर्सन शिव रेग्मीले बताए । रेग्मीका अनुसार जिल्लामा आवश्यकताको तुलनामा प्राविधिक हुनाले पुनः निर्माणको कामले गति लिन सकेको छैन ।

भूकम्प पीडित दुधपोखरी गाउँपालिका-४ का ओमबहादुर गुरुङ पुनःनिर्माणको काम सकिँदा समेत प्राविधिकको अनुगमन र मूल्याङ्कन नगरिदिएकाले दोस्रो किस्ता नपाएको गुनासो गर्छन् । दुधपोखरी गाउँपालिकाको अध्यक्ष छुपिमायाँ गुरुङ दुधपोखरी गाउँपालिका भूकम्पको बढी प्रभावित भएको क्षेत्र भएपनि प्राविधिकहरू पर्याप्त नहुँदा निर्माणको कामले गति लिन नसकेको उनको भनाइ छ ।

जिल्ला विपद् व्यवस्थापन समितिका संयोजक तथा प्रमुख जिल्ला अधिकारी झङ्कनाथ ढकाल जिल्लाको भौगोलिक विकटताको कारणले पनि पुनःनिर्माणको काम प्रभावित भएको बताउँछन् ।

दलबहादुर मजाकोटी