प्राध्यापक अभावमा सञ्चालन भएन प्रयोगात्मक कक्षा

  ०८० पुस २६ गते

धनकुटा बहुमुखी क्याम्पसमा बाहृ वर्षअघि सुरूआत गरिएको चार वर्षे बीएससी कक्षाका लागि प्राणी, रसायन, वनस्पतिशास्त्र र भौतिक विज्ञानमा कम्तीमा १६ जना प्राध्यापक आवश्यक पर्छ ।

तर, अहिले चार जना मात्र प्राध्यापक कार्यरत हुनुहुन्छ । जसले गर्दा प्रयोगात्मक कक्षाका लागि किनिएका महङ्गा उपकरण र सामग्री भएपनि विज्ञान प्रयोगशाला सञ्चालन हुन सकेको छैन् ।

क्यानडा सरकारले बनाई दिएको क्याम्पस भवन ।
क्यानडा सरकारले बनाई दिएको क्याम्पस भवन ।

प्राध्यापक नभएपछि राम्रोसँग कक्षा सञ्चालन नभएको र प्रयोगात्मक कक्षा समेत नभएको बिएससी दोस्रो वर्षमा अध्ययनरत श्रृष्टि कँडेलले बताउनु भयो । भौतिक विज्ञानको प्राध्यापक नै नहुँदा उक्त विषयको पढाइ नै नभएको गुनासो देवराज बुढाथोकीको छ ।

व्यवस्थापकीय कमजोरी र शैक्षिक गुणस्तर सुधारमा गरिएको वेवास्ताका कारण धनकुटा क्याम्पसमा विज्ञान विषयको कार्यक्रम कमजोर बनेको विद्यार्थीको आरोप छ ।

क्याम्पस प्रमुख होमबहादुर बस्नेतले भौतिक पूर्वाधार पर्याप्त भएपनि जनशक्तिको अभावले समस्या भएको बताउनु भयो । उहाँले भन्नुभयो- सबै इक्यूपमेण्ट पर्याप्त भएर संरचना राम्रो भएपनि पछिल्लो अवस्थामा प्रयोगात्मक कक्षा सञ्चालनमा समस्या छ, जनशक्ति त्रिवि सेवा आयोगबाट स्थायी नियुक्ति भएर नदिएका कारण समस्या भएको क्याम्पस प्रमुख बस्नेतको भनाइ छ । उहाँले अहिले भएका शिक्षक पनि आंशिक भएको र तीनै आंशिक  शिक्षकबाट व्यवस्थापन गरिरहेको बताउनु भयो ।

विज्ञान विषय पढ्न चाहने पूर्वका हिमाली र पहाडी जिल्लाका विपन्न विद्यार्थीलाई लक्षित गरी धनकुटा बहुमुखी क्याम्पसले विज्ञान विषयको पढाइ थालनी गरेको थियो । विद्यार्थी आवास सुविधासहितको क्याम्पसमा चार वर्षे बिएसीका लागि जम्मा ८० हजार रुपियाँ तिरे पुग्छ । तर पढ्ने विद्यार्थी र पढाउने प्राध्यापक नहुँदा क्यानडा सरकारको सहयोगमा निर्मित भौतिक संरचना र महङ्गा उपकरणसमेत प्रयोगविहीन हुन पुगेका छन् ।

जसका कारण विज्ञान विषय पढ्न चाहने विद्यार्थी भने महङ्गो शुल्क तिरेर धरान, विराटनगर र काठमाडौंमा सञ्चालित विश्व विद्यालयमा धाउनुपर्ने अवस्था छ ।

कुनै समय पूर्वी नेपालको शैक्षिक केन्द्रका रूपमा स्थापित धनकुटा बहुमुखी क्याम्पस यतिखेर आफ्नो साख धान्नै हम्मे-हम्मे अवस्थामा पुगेको छ ।

डेढ दशक अघिसम्म झण्डै ५ हजार विद्यार्थी अध्ययन गर्ने क्याम्पसमा अहिले विद्यार्थी संख्या दिन प्रतिदिन घट्दो छ ।

शिक्षक अभाव भएर प्रयोगात्मक कक्षा नहुँदा विज्ञान विषयका कक्षाहरू त खाली हुने अवस्थामा पुगेका छन् ।

अहिले बिएससी पहिलो वर्षमा १३ र दोस्रो वर्षमा सात जना विद्यार्थी छन् । प्रयोगात्मक कक्षा नहुँदा  तेस्रो र चौथो वर्षका कक्षामा विद्यार्थी छैनन् ।

तेस्रो र चौथो वर्षका विद्यार्थीले प्रयोगात्मक कक्षा नभएपछि अन्य क्याम्पसमा स्थानान्तरण भएर गएको क्याम्पसका विज्ञान विषयका सहायक क्याक्पस प्रमुख सूर्यदेवप्रसाद यादवले बताउनु भएको छ ।

Photo 202401010 Dhankuta (2)

Photo 202401010 Dhankuta (3)

Photo 202401010 Dhankuta (4)


ईश्वर थापा