समाचारहरू

जिल्ला प्रहरी कार्यालय जुम्लाको हिरासत निकै जीर्ण हुँदा थुनुवालाई बसोबासमा समस्या भएको छ । द्वन्द्वकालमा ध्वष्त भएको प्रहरीको हिरासत मर्मत गरी प्रयोगमा ल्याएपनि जीर्ण अवस्थामा रहँदा थुनुवाहरूलाई बसोबासमा समस्या भएको हो ।

जिल्ला प्रहरी कार्यालयका डिएसपी छेदिलाल कामतिका अनुसार जिल्ला प्रहरी कार्यालयमा भौतिक संरचना अभाव छ । उहाँले भन्नुभयो - 'पुराना द्वन्द्वकालमा क्षतिग्रस्त भौतिक संरचनामै यहाँको प्रहरी र थुनुवा राख्नु पर्ने बाध्यता रहेको छ । जसोतसो काम चलाई रहेका छौँ ।'

यो कार्यालय पुर्ननिर्माणका लागि निर्माण थालिएको लामो समय भयो । तर मुद्दा परेपछि अहिले अलपत्र अवस्थामा रहेको उहाँले बताउनु भयो । उहाँले भन्नुभयो - 'अहिले जीर्ण हिरासत कक्ष १० जना महिला र १० जना पुरुष गरी २० जना क्षमताको मात्र रहेको छ ।'

हिरासत कक्ष साँघुरो भएकोले थुनुवालाई खाना खाने बेला बाहिर ल्याएर खुवाउने गरिएको उहाँले बताउनु भयो । अहिले हिरासत कक्षमा एक जना महिलासहित १० जना थुनुवा रहेका छन् । कार्यालयको भौतिक संरचना अभावका कारण जिल्ला प्रहरी कार्यालयका डिएसपीको कार्यकक्ष टहरामा रहेको छ ।

निर्माणाधीन कार्यालय छिटो निर्माण भएको भए कार्य सम्पादनमा सहज हुने अपेक्षा गरिएको डिएसपी कामतिको भनाइ छ । तर लामो समय भैसकेको र निर्माण हुने अवस्था नदेखिएको उहाँले बताउनु भयो ।

मानदत्त रावल