समाचारहरू

अधिकारकर्मी तथा अन्तरपार्टी महिला सञ्जाल पर्वतकी अध्यक्ष मनरूपा शर्मा सुवेदीलाई कुटपिट गरेको आरोपमा प्रहरीले कुश्मा नपा-१ पाङका ३० वर्षीय गणेश अर्याललाई भदौ १२ गते गिरफ्तार गरेको छ ।

भदौ ११ गते अर्यालकी जेठी पत्नी मेनका अर्यालले दिएको उजुरीका सम्बन्धमा छलफल गर्ने क्रममा अन्तरपार्टी महिला सञ्जाल पर्वतकी अध्यक्ष रहेकी मनरूपा शर्मा सुवेदीलाई अर्यालले कुटपिट गरेको पीडित शर्माले आरोप लगाइन् ।

शर्माका अनुसार आरोपित अर्यालले बहुविवाह गरेको र घरेलु हिंसा गरेको भन्दै उनकी जेठी पत्नी मेनका अर्यालले अन्तरपार्टी महिला सञ्जालमा उजुरी दिएपछि सोही विषयमा छलफल गर्न दुवै पक्ष जिल्ला प्रहरी कार्यालय पुगेका थिए ।

छलफलकै क्रममा अर्यालले सुवेदीको मोबाइल समेत भुइँमा बजारिदिएको र कुटपिटबाट सामान्य चोट लागेको सुवेदीले बताइन् ।

घटनापछि अन्तरपार्टी महिला सञ्जाल पर्वतकी सचिव कलावती पुरी र अध्यक्ष मनरूपा शर्मा सुवेदीले संयुक्त विज्ञप्ति जारी गर्दै अर्याललाई कानुन बमोजिम कारवाहीको माग गरेका छन् ।

छलफलका क्रममा अर्यालले कान्छी पत्नी चन्द्रा अधिकारीलाई समेत प्रहरीकै अगाडि कुटपिट गरेपछि उनको पर्वत जिल्ला अस्पतालमा उपचार गरिएको छ ।

सन्तोष थापा