प्रहरी चौकी तोडफोड गरेको आरोपमा माओवादी कार्यकर्ता गिरफ्तार

 

त्रिवेणी गाउँपालिका–९ नुवाकोट प्रहरी चौकी तोडफोड गरेको आरोपमा नेकपा माओवादी केन्द्रका त्रिवेणी गाउँपालिकाका अध्यक्ष गणेशबहादुर खड्कालाई प्रहरीले वैशाख २७ गते गिरफ्तार गरेको छ ।

गत वैशाख २२ गते नेपाली काङ्ग्रेस र माओवादी केन्द्रका कार्यकर्ताको झडपमा काङ्ग्रेस कार्यकर्ता सुरक्षाको लागि प्रहरी चौकीमा गएपछि माओवादी कार्यकर्ताले प्रहरी चौकी नै तोडफोड गरेका थिए ।

गाउँकमिटीका अध्यक्ष खड्काको निर्देशनमा प्रहरी चौकी तोडफोड भएको आरोपमा अध्यक्ष खड्कालाई गिरफ्तार गरेको जिल्ला प्रहरी कार्यालयका विष्णु सोतीले जानकारी दिनु भएको छ । तोडफोडबाट प्रहरी चौकी रहेको घरको छाना, सोलार, झ्याल र ढोका क्षति भएको छ । चौकीमा कति क्षति भएको भन्ने विषयमा जिल्ला प्रहरी कार्यालय रुकुम पश्चिमले जानकारी दिन चाहेको छैन ।

त्रिवेणी गाउँपालिकाको चुनाव प्रचारप्रसारको समयमा नेकपा माओवादी केन्द्र र नेपाली काङ्ग्रेसका कार्यकर्ता बीच भएको झडपमा नेपाली काङ्ग्रेसबाट त्रिवेणी गाउँपालिकाका अध्यक्षका उम्मेद्वार चढेको गाडी तोडफोड गर्नुका साथै ६ जना काङ्ग्रेस कार्यकर्ता घाइते भएका थिए ।


मनिषा केसी