समाचारहरू

रुपन्देहीको मर्चवारस्थित प्रहरी चौकीवडवलियामा आक्रमणपछि भएको झडपका क्रममा लुटिएको एसएलआर फेला परेको जिल्ला प्रहरी कार्यालय रुपन्देहीका डिएसपी बेलबहादुर पाण्डेले जानकारी दिएका छन् ।

लुटिएको मध्ये एसएलआर मर्चवारको बगौली-६ मा बेवारिसे अवस्थामा खेतमा भेटिएको र टियर ग्याँस गन अझैसम्म फेला नपरेको र हराएको हतियारको खोजी कार्य भैरहेको डिएसपी पाण्डेले बताए ।

फागुन ८ गते भएको झडपका क्रममा प्रहरीको साथबाट आन्दोलनकारीले दुई वटा हतियार एसएलआर र टियर ग्याँस गन लुटेका थिए ।

झडपका क्रममा प्रहरीले चार जना विद्यार्थीलाई गिरफ्तार गरेको छ । झडपका क्रममा प्रहरीको लाठी चार्जबाट कृष्ण हरिजन, राहुल यादव, रीमा ठाकुर, जोगेन्द्र ठाकुर, श्याम प्रकाश गुप्ता, राम निवास जयसवाल, शिला गिरी, राजकुमार कुर्मी घाइते भएको र राजकुमार कुर्मीको टाउकोमा तीन वटा टाँका लगाइएको स्थानीय रामविकाश चौधरीले बताए ।

आन्दोलनकारीहरूको आक्रमणबाट प्रहरीका सईसहित पाँच जना घाइते भएका छन् । घाइते हुनेमा इलाका प्रहरी कार्यालय मर्चवारका सई राजकुमार क्षेष्ठ, हवल्दार अर्जुन रोक्का, जवानहरू रमेश पाल, अम्मर मल्ल र रामबहादुर भण्डारी रहेको डिएसपी पाण्डेले जानकारी दिए ।

स्वतन्त्र मधेश गठबन्धनका नाममा सक्रिय सिके राउतका कार्यकर्ताले फागुन ८ गते प्रहरी चौकीमा आक्रमण गर्नुका साथै हतियार समेत लुटेको प्रहरीले जनाएको थियो ।

रुपन्देहीको मर्चवारमा स्वतन्त्र मधेश गठबन्धनको माग गर्दै आएका सिके राउतका कार्यकर्ता र प्रहरीबिच फागुन ७ गते झडप भएको छ ।

झडपका कारण मर्चवार क्षेत्रको मझगाँवा दिनभरी तनाव ग्रस्त रह्यो । सिके राउतका कार्यकर्ताले मर्चवार क्षेत्रको मझगाँवामा आयोजना गरेको आमसभालाई प्रहरीले रोक्न खोजेपछि झडप भएको थियो । झडपका क्रममा प्रहरीले ५ सेल अश्रुग्याँससमेत प्रहार गरेको छ ।

जिल्ला प्रहरी कार्यालय रुपन्देहीका डिएसपी बेलबहादुर पाण्डेका अनुसार दोहोरो झडपमा परी पाँच जना प्रहरी घाइते भएका छन् भने गठबन्धनका आठ जना कार्यकर्तालाई गिरफ्तार गरिएको छ । गठबन्धनका रुपन्देही संयोजक भुपेन्द्र यादवले झडपमा सर्वसाधारण र आफ्ना कार्यकर्ता गरी ५१ जना घाइते भएको र २५ जनालाई गिरफ्तार गरेको आरोप लगाए ।

प्रहरीका अनुसार गठबन्धनका कार्यकर्ताले लु १ ख ४९८१ नम्बरको ट्रकमा पेट्रोल छर्केर आगजनी गरेका छन् । आगजनीबाट ट्रकको अगाडिको धेरैजसो भाग जलेको छ ।

झडपपछि गठबन्धनका कार्यकर्ताहरूले मर्चवारको पर्साहवा चोकमा कोणसभा गरी प्रहरीले गरेको धरपकडको विरोध गरेका थिए ।

रीमा बि.सी.