प्रहरीले हिरासतमा यातना दिएको पीडित पक्षको आरोप

  ०७८ चैत ३ गते

धरान उपमहानगरपालिका–१८ का २२ वर्षीय विदुर राईलाई प्रहरीले हिरासतमा यातना दिएको पीडित पक्षले आरोप लगाएको छ ।

पीडितकी ४० वर्षीया सानी आमा बविता राईले चैत २ गते राष्ट्रिय मानव अधिकार आयोग प्रदेश कार्यालय विराटनगरमा प्रहरीले हिरासतमा विदुरलाई यातना दिएको आरोपमा निवेदन दिएको आयोगकी प्रदेश प्रमुख नितु गड्तौलाले इन्सेक प्रतिनिधिसँगको फोन सम्पर्कमा बताउनु भयो । उहाँले घटनाका विषयमा आयोगले जिल्ला प्रहरी कार्यालय सुनसरीको ध्यानाकर्षण गरेको बताउनु भएको छ ।

इलाका प्रहरी कार्यालय धरानका डिएसपी नरेन्द्र कुवँरले विदुर राईलाई अनुसन्धानका लागि चैत १ गते गिरफ्तार गरेको भएपनि हिरासतभित्र यातना नदिएको इन्सेक प्रतिनिधिसँगको फोन सम्पर्कमा बताउनु भयो ।

डिएसपी कुवँरले विदुर राईविरूद्ध कुटपिट गरेको आरोपमा धरान उपमहानगरपालिका–११ का २४ वर्षीय नविन गुरुङले फागुन २७ गते इलाका प्रहरी कार्यालय धरानमा उजुरी दिएको बताउनु भयो ।

आरोपित राईविरूद्ध प्रहरीमा कुटपिट र कर्तव्य ज्यान शीर्षकमा उजुरी परेको डिएसपी कुवँरको भनाइ छ ।

आपसी विवाद क्रममा फागुन २७ गते विदुर राईले कुटपिट गरेको नविन गुरुङको आरोप छ ।

पीडित गुरुङले आरोपित विदुर राईविरूद्ध फागुन २७ गते इलाका प्रहरी कार्यालय धरानमा उजुरी दिएको प्रहरीले जनाएको छ ।

विदुर राईको कुटपिटबाट सामान्य घाइते भएका गुरुङको फागुन २७ गते वीपी कोइराला स्वास्थ्य विज्ञान प्रतिष्ठान धरान घोपामा उपचार गरिएको छ ।

Photo 20220316 Sunsari


जयकृष्ण यादव